پاکستان کے سابق لیجنڈ کرکٹر وسیم اکرم کی اہلیہ شنیرا اکرم نے  سابقہ اداکارہ ، ماڈل اور میزبان نور بخاری  پر تنقید کی جب انہوں نے نئی فلم ’لندن نہیں جاؤں گا‘ میں رومانوی ہیرو کا کردار ادا کرنے پر ہمایوں سعید کو تنقید نشانہ بنایا۔

نور بخاری نے پوسٹ میں کمزور کہانی کی طرف اشارہ کرتے ہوئے کہا تھا  کہ ہمایوں سعید کو زمانے کے ساتھ نہیں چلنا کیونکہ اس دور میں محبت نہیں ہوتی، کہانی بہت کمزور ہے، اب نوجوان کرداروں کی باری ہے انہیں موقع دیں، بس ہضم کرنا مشکل ہے۔

انہوں نے ہدایت کاری کی تعریف کرتے ہوئے کہا تھا  کہ ندیم بیگ نے بہت اچھی شوٹنگ کی ہے، سینماٹوگرافی بہترین ہے، لیکن افسوس محبت کی کہانی؟

حال ہی میں انسٹاگرام پر شنیرا اکرم نے عمر کے بارے میں نور بخاری کے تبصروں کا جواب دیا۔

انہوں نے کہا کہ  میں اس بارے میں نہیں جانتی لیکن  میرے تجربے سے مجھے لگتا ہے کہ بہت ساری ناقابل یقین محبت کی کہانیاں زندگی کے دوسرے حصے میں ہوتی ہیں بس اس بات پر منحصر ہے کہ اسکرپٹ  کس طرح کی لکھی گئی ہے۔

شنیرا اکرم نے مزید کہا کہ بہت سے لوگوں کو ان کی سچی محبت نہیں ملی ہے یا وہ اب بھی اس کی تلاش میں ہیں، دنیا میں بہت سے غیر شادی شدہ، طلاق یافتہ یا بیوہ لوگ ہیں، انہیں مسترد نہ کریں۔

واضح رہے کہ فلم ’لندن نہیں جاؤں گا‘ نے 40 کروڑ روپے کما لیے ہیں، اس فلم کو عید الاضحٰی   کے موقع پر ریلیز کیا گیا تھا جبکہ فلم کے پروڈیوسر اور اداکار ہمایوں سعید اپنی فلم کی زبردست کامیابی پر خوش ہیں ۔