پاکستان تحریک انصاف (پی ٹی آئی) کے رہنما ڈاکٹر شہباز گل کا کہنا ہے کہ پی ٹی آئی کے تمام فنڈز کا ریکارڈ الیکشن کمیشن کو جمع کروایا جاچکا ہے۔

سماجی رابطے کی ویب سائٹ ٹوئٹر پر اپنے جاری کردہ بیان میں شہباز گل نے کہا کہ مسلم لیگ ن، پیپلزپارٹی اور پی ٹی آئی کے ممنوعہ فنڈنگ کیس کا فیصلہ اکٹھا ہونا ہے۔

پی ٹی آئی کے تمام فنڈز کاریکارڈ الیکشن کمیشن کو جمع کروایاجاچکاہے
PTI, PPP, PMLN
ممنوعہ فنڈنگ کیس کا
فیصلہ اکٹھا ہوناہے عدالتی حکم کے مطابق
ن اور پی پی اپناریکارڈ طلب کرنے کے باوجود کیوں جمع نہیں کروارہے؟
ظاہرہے بھتہ کی پرچیاں ریکارڈمیں جمع کیسے کروائیں گے
بہت نازک صورتحال ہے

— Dr. Shahbaz GiLL (@SHABAZGIL) July 29, 2022

پی ٹی آئی رہنما کا کہنا ہے کہ عدالتی حکم کے مطابق ن لیگ اور پیپلزپارٹی اپنا ریکارڈ طلب کرنے کے باوجود کیوں جمع نہیں کروارہے؟

شہباز گل نے مزید کہا کہ ظاہر ہے بھتہ کی پرچیاں ریکارڈ میں جمع کیسے کروائیں گے بہت نازک صورتحال ہے۔

اس سے قبل مسلم لیگ ن کے رہنما اور سابق وزیر اعظم شاہد خاقان عباسی نے الیکشن کمیشن کے باہر میڈیا سے گفتگو کرتے ہوئے کہا تھا کہ پی ٹی آئی نے آٹھ سال میں کوئی ریکارڈ الیکشن کمیشن کونہیں دیا۔

 سابق وزیر اعظم شاہد خاقان عباسی کا کہنا تھا کہ پی ڈی ایم اور پیپلز پارٹی وفد نے چیف الیکشن کمشنر سے ملاقات کی ہے اور ملاقات میں پی ٹی آئی فارن فنڈنگ کیس کا فیصلہ سنانے کا مطالبہ کیا ہے۔

شاہد خاقان عباسی نے کہا کہ آٹھ سال سے پی ٹی آئی فارن فنڈنگ کیس کا فیصلہ نہیں آیا، کوئی جماعت بیرونی شخص سے پیسہ لے تو ڈیکلیئر کرنا ہوتا ہے۔

انہوں نے کہا کہ اکبر بابر نے پی ٹی آئی فارن فنڈنگ کے ثبوت الیکشن کمیشن میں پیش کیے، پی ٹی آئی نے اس کیس کا فیصلہ روکنے کیلئے الیکشن کمیشن پر دبائو ڈالا۔