کامن ویلتھ گیمز کے ہاکی ایونٹ میں پاکستان ٹیم  نے اپنی مہم کا آغاز جنوبی افریقہ کے خلاف میچ سے کیا  جو 2-2 گول سے برابر رہا۔

تفصیلات کے مطابق انگلینڈ کے شہر برمنگھم میں جاری کامن ویلتھ گیمز ہاکی ایونٹ میں پاکستان اور جنوبی افریقہ کے مابین کھیلے جانے والا سنسنی خیز میچ 2-2 گول سے برابر رہا۔

پہلے کوارٹر کے 14ویں منٹ میں  جنوبی افریقہ کی جانب سے بیوچر نے شارٹ کارنر کے ذریعے گول اسکور کیا  جسے 25 ویں منٹ میں پاکستان کے رضوان علی نے شارٹ کارنر کے ذریعے گول اسکور کرکے برابر کردیا۔

جنوبی افریقہ نے چوتھے کوارٹر میں گول اسکور کرکے میچ میں ایک کے مقابلے میں دو گول کی برتری  حاصل کرلی  لیکن کھیل کے آخری لمحات میں پاکستان کے افراز نے بہترین گول اسکور کرکے میچ 2-2 گول سے برابر کردیا۔

پاکستان اپنا دوسرا میچ کل 31 جولائی کو نیوزی لینڈ کے  خلاف کھیلے گا۔

قومی ہاکی ٹیم کے کپتان عمر بھٹہ کا کہنا ہے کہ  ٹیم جنوبی افریقہ کے خلاف اچھا کھیلی ہے، میچ ڈرا  ہوا ہے ہم نے کوئی پوائنٹ ضائع نہیں کیا۔ نیوزی لینڈ کے خلاف دوسرے میچ میں آل آوٹ جائیں گے اور میچ جیت کر سیمی فائنل میں جگہ بنائیں گے۔

ہیڈ کوچ سیگفرئیڈ ایکمین کا کہنا ہے کہ جیت رینکنگ میں بہتری لاتی ہے، نیوزی لینڈ کے خلاف میچ میں اپنی غلطیوں کو دور کریں گے۔

سیگفرئیڈ ایکمین کا کہنا ہے کہ پہلے میچ میں جو غلطیاں ہوئیں ان پر کام کریں گے اور اپنا بہترین کھیل پیش  کریں گے۔ ہماری ڈربلنگ اچھی ہے لیکن پینلٹی کارنر حاصل نہیں کرسکے اس پر کام  کریں گے۔

انہوں نے مزید کہا کہ پاکستان بہترین ٹیم ہے، کھلاڑیوں میں گول کرنے کی بھوک ہے ۔

ٹیم کے مینجر سمیر حسین کا کہنا تھا کہ پاکستان ٹیم کی کارکردگی بہترین رہی، پہلے میچ میں کم بیک کیا اور  میچ برابر رہا۔ یہاں جتنی ٹیمیں ہیں وہ رینکنگ میں اوپر ہیں لیکن ہمارے لڑکوں نے بہترین کھیل پیش کیا۔

سمیر حسین نے مزید کہا کہ  دو کھلاڑیوں کو کورونا ہوگیا تھا وہ ٹریننگ میں نہیں تھے لیکن اب لڑکے ایک ہوکر کھیل رہے ہیں اچھے رزلٹس ملیں گے۔