پیپلز پارٹی کے رہنما علی حیدر گیلانی نے کہا ہے کہ اسپیکر پنجاب اسمبلی کیلئے کمپرومائز انتخابات ہوئے۔

تفصیلات کے مطابق علی حیدر گیلانی نے اپنے ایک بیان میں کہا کہ ڈپٹی اسپیکر کے انتخاب کیلئے ہم نے بائیکاٹ کا اعلان کیا ہے۔

ان کا کہنا تھا کہ تحریک انصاف فکس میچ کھیلنے کی عادی ہے۔

انہوں نے مزید کہا کہ عمران خان کے امیدوار کے خلاف ووٹ دینے کیلئے ان کے رہنما کل بھی تیار تھے۔

واضح رہے کہ پاکستان تحریک انصاف (پی ٹی آئی) نے پنجاب میں ایک اور کامیابی حاصل کر لی ہے، پی ٹی آئی امیدوار واثق قیوم بلا مقابلہ ڈپٹی اسپیکر پنجاب اسمبلی منتخب ہوگئے ہیں۔

ڈپٹی اسپیکر دوست محمد مزاری کے خلاف عدم اعتماد کی تحریک کامیاب ہونے کے بعد ڈپٹی اسپیکر کی نشست خالی تھی، پی ٹی آئی نے ڈپٹی اسپیکر کیلئے واثق قیوم عباسی کو امیدوار نامزد کیا تھا اور انہوں نے اپنے کاغذات مامزدگی جمع کرائے تھے تاہم اب وہ بلا مقابلہ ڈپٹی اسپیکر پنجاب اسمبلی منتخب ہوگئے۔

یاد رہے کہ پنجاب اسمبلی میں اپوزیشن جماعتوں نے علی حیدر گیلانی کو امیدوار نامزد کیا تھا۔

ڈپٹی اسپیکر پنجاب اسمبلی منتخب ہونے کے بعد واثق قیوم نے میڈیا سے گفتگو کرتے ہوئے کہا کہ آج وزیر اعلیٰ ، اسپیکر اور ڈپٹی اسپیکر تحریک انصاف کے پاس ہے، امپورٹڈ حکومت نے بڑے دعوے کیئے تھے عوام نے ان کا علاج کردیا ہے، اب ہمارا رخ وفاقی حکومت کی جانب ہے، ہماری کامیابیوں کا تسلسل جاری رہے گا۔