سعودی وزارت حج و عمرہ نے بیرون ممالک سے آنے والے عمرہ زائرین کے لیے ریپڈ پی سی آر ٹیسٹ اور کورونا ویکسینیشن سرٹیفکیٹ کی شرط ختم کر دی ہے۔

سعودی وزارت حج وعمرہ کے مطابق بیرون ممالک سے آنے والے زائرین کے لیے پی سی آر ٹیسٹ رپورٹ اور کورونا ویکسین سرٹیفیکیٹ پیش کرنا ضروری نہیں رہا البتہ کووڈ 19 میڈیکل انشورنس اسکیم حاصل کرنا ضروری ہے۔

سعودی وزارت حج و عمرہ نے کہا کہ عمرہ زائرین کے لیے سعودی عرب آنے سے قبل ریپڈ کورونا ٹیسٹ کی پابندی بھی ختم کردی گئی ہے۔

وزارت حج وعمرہ کا یہ بھی کہنا تھا کہ عمرہ ویزے پر آنے والے سعودی عرب میں 90 روز تک قیام کرسکتے ہیں، انہیں اس دوران مکہ اور مدینہ سمیت سعودی عرب کے تمام شہروں میں آنے جانے کی آزادی ہوگی تاہم بیرون ممالک سے آنے والے عمرہ زائرین کو کورونا میڈیکل انشورنس کروانا لازمی قرار دیا گیا ہے۔

یہ بھی پڑھیں: مکہ معظمہ، خانہء کعبہ کے اطراف حفاظتی رکاوٹ ہٹا دی گئی

اس سے قبل حرمین الشریفین جنرل پریذیڈنسی کی ویب سائٹ کے مطابق ڈاکٹر شیخ عبدالرحمٰن السدیس نے زائرین کو خوشخبری دیتے ہوئے کہا تھا کہ خانہء کعبہ کے اطراف جو رکاوٹیں حفاظتی تدبیر کے طور پر قائم کی گئی تھیں ،ایوان شاہی نے انہیں ہٹانے کی منظوری دے دی ہے۔