ترجمان حکومت پنجاب فیاض الحسن چوہان کا کہنا ہے کہ پاکستان کو اس وقت سب سے زیادہ شدت پسندی کا سامنا ہے۔

فیاض الحسن چوہان نے نجی اسکول کی تقریب سے خطاب کرتے ہوئے کہا کہ 11 اگست، یوم مینارٹی کے طور پر منایا جاتا ہے، میں اسکا قائل نہیں، مینارٹی بھی ہمارا حصہ ہیں وہ ہم سے علیحدہ نہیں۔

 انہوں نے کہا کہ 11 اگست کو قائد اعظم کی مشہور تقریر تاریخ کا حصہ ہے، ہمارے اسلام نے مینارٹیز کو سب سے زیادہ حقوق دیئے ہیں۔

’اسلام مینارٹی کی عزت وقار کا تحفظ فراہم کرتا ہے‘

فیاض الحسن چوہان نے کہا کہ محمد بن قاسم نے آکر جو مینارٹی کو عزت وقار دی اور جب وہ جانے لگے تو وہ لوگ دھاڑے مار مار کر رونے لگے، اسلام مینارٹی کی عزت وقار کا تحفظ فراہم کرتا ہے۔

ترجمان وزیراعلیٰ پنجاب نے کہا کہ یہ ادارہ ہر قومی دن کو بھرپور انداز میں مناتا ہے جو قابل تحسین ہے، طلباء کی آبیاری میں یہ بہت زیادہ ضروری ہے۔

’پاکستان کو اس وقت شدت پسندی کا سامنا ہے‘

انکا کہنا ہے کہ پاکستان کو اس وقت سب سے زیادہ شدت پسندی کا سامنا ہے، کہیں برادریوں، کہیں لسانیت، کہیں مذہبی اور کہیں فرقوں کی بنیاد پر شدت پسندی کا سامنا ہے۔

’اقلیتوں کو پاکستان میں تحفظ حاصل ہے‘

فیاض الحسن چوہان نے مزید کہا کہ تحریک پاکستان میں ہر عقیدے اور نظریے کے افراد شامل تھے، ایک ریاست میں ہر شہری کے برابر حقوق ہوتے ہیں، اقلیتوں کو پاکستان میں تحفظ حاصل ہے۔

آج ملک بھر میں اقلیتوں کا قومی دن منایا جارہا ہے

آج ملک بھر میں اقلیتوں کا قومی دن منایا جارہا ہے، اس دن منانے کا مقصد پاکستان کے قیام میں اقلیتوں کی خدمات کو خراج تحسین پیش کرنا ہے، حکومت پاکستان نے 2009 میں 11 اگست کو اقلیتوں کا قومی دن قرار دیا تھا۔