سابق وفاقی وزیر اسد عمر نے کہا ہے کہ شہباز گل پر تشدد کر کے مطلوبہ بیان دلوانے کی ناکام کوشش کی جارہی ہے۔

رہنما پی ٹی آئی اسد عمر نے اڈیالہ جیل کے باہر میڈیا سے گفتگو کرتے ہوئے کہا کہ شہبازگل سے ملاقات ہوئی ہے، وہ ٹھیک ہیں۔

انہوں نے کہا کہ شہبازگل جب اسلام آباد پولیس کی کسٹڈی میں تھے تو ان پر تشدد کیا گیا تھا جس کے نشانات جج کو دکھائے اور ان پر تشدد کرکے عمران خان کے خلاف بیان لینے کی کوشش کی جارہی ہے۔

Advertisement

شہباز گل سے اڈیالہ ملاقات ہوئی. حوصلہ ابھی بھی بلند ہے. بد ترین تشدد کے باوجود، جو اس پر اسلام آباد میں کیا گیا، عمران خان کے خلاف جھوٹا بیان دینے سے انکار کر دیا. فون اسے حراست میں لیتے ہوئے ہی پولیس نے لے لئیے تھے. سوائے مزید تشدد کرنے کے ریمانڈ مانگنے کی اور کوئی وجہ نہیں

— Asad Umar (@Asad_Umar) August 17, 2022

انہوں نے مزید کہا کہ شہباز گل پر جس بیان پر مقدمہ بنایاگیا ہے وہ براہ راست  نشر ہوا ہے لیکن فون کا بہانہ بنایا جارہا ہے اور فون تو اُسی دن پولیس نے لے لیے تھے۔

اسد عمر کا کہنا تھا کہ شہبازگل سے عمران خان کے خلاف بات نکلوانے کیلئے ریمانڈ مانگا جارہا ہے لیکن آج ان سے ملاقات کے دوران شہبازگل کو بتایا کہ پارٹی لیڈر اور ورکر اُن کے ساتھ کھڑے ہیں۔

ان کا کہنا تھا کہ اس وقت شہباز گل کی بیل درخواست دی ہوئی ہے، ضمانت مل گئ تو شہباز گل کا میڈیکل کرائیں گے۔

انہوں نے بتایا کہ شہباز گل محب وطن ہے اور اس سے کبھی پاکستان کے خلاف بات نہیں سنی ہے جبکہ ن لیگ جے یو آئی و دیگر جماعتوں نے بھی افواج کے خلاف بات کی ہے

ان کا کہنا تھا کہ عمران خان ہمیشہ قانون کی بالادستی اور حکمرانی کی بات کرتے ہیں، نواز شریف واپس آئیں گے تو ان کے لیے قانون کے مطابق فیصلہ ہونا چاہیے۔