وزیر قانون و انصاف اعظم نذیر تارڑ کا کہنا ہے کہ سابقہ ​​حکومت کی ناقص مالیاتی پالیسیوں کی وجہ سے پاکستان دیوالیہ ہونے کے دہانے پر پہنچ گیا۔

تفصیلات کے مطابق آج سینیٹ کا اجلاس چئیرمین سینیٹ صادق سنجرانی کی صدارت میں شروع ہوا جس دوران رواں اجلاس کے لئے پریذائیڈنگ آفیسرز کا اعلان کیا گیا ہے جن میں ذیشان خانزادہ، سینیٹر عرفان صدیقی اور سینیٹر رخسانہ زبیری شامل ہیں۔

ایوان نے سیلاب، شمالی وزیرستان میں خودکش حملے اور رحیم یار خان میں سڑک حادثے میں جاں بحق ہونے والے افراد کے لیے فاتحہ خوانی کی جبکہ سینیٹر عطا الرحمن نے دعا کرائی ۔

وزیر قانون و انصاف اعظم نذیر تارڑ:

سینیٹ میں پوائنٹ آف آرڈر پر بات کرتے ہوئے وزیر قانون و انصاف اعظم نذیر تارڑ نے کہا کہ حکومت نے ملکی معیشت کو بچانے کے لیے مشکل فیصلے کیے ہیں۔

انہوں نے کہا کہ پیٹرولیم کی قیمتوں میں اضافہ ایک سخت فیصلہ تھا اور حکومت نے یہ فیصلہ بھاری دل کے ساتھ کیا ہے۔ انہوں نے کہا کہ آنے والے نوٹیفکیشن میں عوام کو پٹرولیم مصنوعات کی قیمتوں میں ریلیف ملے گا۔

وفاقی وزیر نے کہا کہ یہ پچھلی حکومت تھی جس نے آئی ایم ایف کے ساتھ معاہدہ کیا تھا اور پٹرولیم کی قیمتوں پر سبسڈی نہ دینے کا عہد کیا تھا۔

قبل ازیں قائد حزب اختلاف ڈاکٹر شہزاد وسیم نے بین الاقوامی منڈیوں میں قیمتوں میں کمی اور امریکی ڈالر کے مقابلے روپے کی قدر میں استحکام کے باوجود پیٹرولیم مصنوعات کی قیمتوں میں کمی نہ کرنے پر حکومت کو تنقید کا نشانہ بنایا۔

قائد خزب اختلاف ڈاکٹر وسیم شہزاد کا ایوان میں نقطہ اعتراض:

ڈاکٹر وسیم شہزاد نے کہا ہے کہ عوام کے اوپر پٹرول بم گرایا گیا،اس سلسلے میں ایوان میں ایک تحریک التوا بھی جمع کروائی گئی ہے۔

انہوں نے کہا کہ حکومت فاشزم پر اتر آئی  ہے ، صحافیوں اور سیاسی لیڈران کو گرفتار کیا جارہا ہے ۔

انہوں نے مزید کہا کہ شہباز گل کے ساتھ جو کچھ ہورہا ہے وہ سب کے سامنے ہے ۔

جے یو آئی ف نے پیٹرولیم مصنوعات کی قیمتوں میں اضافے کو مسترد کردیا:

حکومتی اتحادی جے یو آئی ف کی جانب سے پیٹرولیم مصنوعات کی قیمتوں میں اضافے کو مسترد کردیا گیا ہے۔

اس حوالے سے سینیٹر عطاء الرحمان نے کہا کہ جے یو آئی پٹرولیم مصنوعات کی قیمتوں میں اضافے کو مسترد کرتی ہے۔

خیال رہے کہ سینیٹ اجلاس کل جمعرات کی صبح ساڑھے بجے تک ملتوی کردیا گیا ہے۔