سہیل محمود نے کہا ہے کہ پاکستان جمہوریہ کرغزستان کے ساتھ اپنے خوشگوار اور دوستانہ تعلقات کو بہت اہمیت دیتا ہے۔

ترجمان دفتر خارجہ کے مطابق سکریٹری خارجہ سہیل محمود سے کرغزستان کے نائب وزیر خارجہ آرٹیک بائیف ایبیک محترووچ کی ملاقات ہوئی ہے۔

 ملاقات میں سیکرٹری خارجہ سہیل محمود نے اقتصادی، تجارتی، سرمایہ کاری اور عوام سے عوام کے روابط کو مزید بڑھانے کی پاکستان کی خواہش کا اعادہ کیا جبکہ سیکرٹری خارجہ نے اس بات کا اعادہ کیا کہ پاکستان جمہوریہ کرغزستان کے ساتھ اپنے خوشگوار اور دوستانہ تعلقات کو بہت اہمیت دیتا ہے۔

ان کا کہنا تھا کہ یہ خوش آئند امر ہے کہ دونوں ممالک اپنے سفارتی تعلقات کے قیام کے 30 سال مکمل کر رہے ہیں، کرغزستان کے ساتھ پاکستان کے دو طرفہ تعلقات پانچ جہتی ”ویژن وسطی ایشیا“ پر استوار ہیں۔

سہیل محمود نے تعلقات میں مثبت رفتار کو برقرار رکھنے کے لیے باقاعدہ اعلیٰ سطحی سیاسی مشغولیت کی اہمیت پر زور دیا اور کہا کہ پاکستان کرغزستان کے درمیان دوطرفہ سیاسی مشاورت کا دوسرا اجلاس دونوں ممالک کے درمیان تعاون کی نئی راہیں کھولنے میں مدد دے گا۔

 سیکرٹری خارجہ سہیل محمود کا مزید کہنا تھا کہ افغان عبوری حکام اور عالمی برادری کے درمیان عملی تعاون علاقائی امن و استحکام کے مفاد میں ہے، افغانستان کو درپیش سنگین انسانی اور معاشی بحرانوں سے نمٹنے کے لیے افغان عوام کو عالمی برادری کی مدد کی ضرورت ہے۔

واضح رہے کہ کرغزستان کے نائب وزیر خارجہ پاکستان اور کرغزستان کے درمیان دوطرفہ سیاسی مشاورت کے دوسرے اجلاس میں شرکت کے لیے اسلام آباد کا دورہ کر رہے ہیں، کرغزستان کے نائب وزیر خارجہ اسلام آباد میں قیام کے دوران مختلف سیاسی رہنماؤں، معززین اور کاروباری برادری کے ارکان سے بھی ملاقاتیں کریں گے۔