پاکستان تحریک انصاف (پی ٹی آئی) کے رہنما بابر اعوان کا کہنا ہے کہ شہبازگل پر عمران خان کے خلاف بیان دینے کیلئے تشدد کیا جارہا ہے۔

بابر اعوان نے اسلام آباد میں میڈیا سے گفتگو کرتے ہوئے کہا کہ شہبازگل پر تشدد کیا گیا، ان پر تشدد کیخلاف درخواست دائر کردی ہے، کسی پر جرم قبول کرنے کیلئے دباؤنہیں ڈالا جاسکتا، قانون کے مطابق کسی پر بھی تشدد نہیں کیا جاسکتا۔

‘شہبازگل کے میڈیکل بورڈ پر اعتماد نہیں’

رہنما پی ٹی آئی نے کہا کہ شہباز گل کے میڈیکل بورڈ پر اعتماد نہیں، ان کیلئے آزاد وخود مختار میڈیکل بورڈ تشکیل دیا جائے۔

‘ہٹلر ٹو کے انچارج شہبازشریف ہیں’

انہوں نے کہا کہ ملک میں جمہوریت نہیں بلکہ جمہوری نازی ازم ہے، ہٹلر ٹو کے انچارج شہبازشریف ہیں، نوازشریف کے بعد اب شہبازشریف نے بھی مائنس ون ہونا ہے۔

‘عمران خان کو پھنسایا نہیں جاسکتا’

بابر اعوان نے کہا کہ شہبازگل سے اندازہ ہورہا ہے حکومت لوگوں کی آوازیں بندکررہی ہے، ملکی تاریخ میں ایسا بدترین ٹارچر کسی کے ساتھ نہیں کیا گیا۔

پی ٹی آئی رہنما کا کہنا ہے کہ عمران خان کو پھنسایا نہیں جاسکتا، امید ہے عدالت سے انصاف ملے گا، شہباز گل پر عمران خان کے خلاف بیان دینے کے لیے تشدد کیا جارہا ہے، کوشش کی جارہی ہے کسی طرح عمران خان کو پھنسایا جائے۔

شہباز گل پمز کارڈیالوجی ایمبرجنسی سے پرائیویٹ وارڈ میں منتقل

پاکستان تحریک انصاف (پی ٹی آئی) کے رہنما شہباز گل کو ابتدائی طبعی معائنہ کے بعد پمز کارڈیالوجی ایمبرجنسی سے پرائیویٹ وارڈ میں منتقل کر دیا گیا ہے۔

ذرائع کے مطابق شہباز گل کو جن پرائیویٹ رومز میں منتقل کیا گیا اس سے پہلے آصف علی زرداری اور نواز شریف بھی داخل رہے ہیں۔

ذرائع کا کہنا ہے کہ ڈاکٹرز کی جانب سے ابتدائی طبعی معائنہ رپورٹ تیار کی جا رہی ہے، اگر شہباز گل کو ہسپتال میں داخل رکھنا ہوا تو ان پرائیویٹ رومز کو سب جیل قرار دیا جا سکتا ہے۔

شہباز گل کو پمز اسپتال پہنچا دیا گیا

پاکستان تحریک انصاف (پی ٹی آئی) کے رہنما شہباز گل کو سانس لینے میں دشواری پر طبعی معائنہ کے لئے پمز اسپتال پہنچا دیا گیا ہے۔

ذرائع کے مطابق پمز اسپتال میں سیکورٹی ہائی الرٹ کر دی گئی ہے جبکہ اسلام آباد پولیس کی اضافی نفری پمز ایمرجنسی میں تعینات کی گئی ہے۔