وزیر خارجہ شاہ محمود قریشی نے کہا ہے کہ پاکستان خطے میں امن چاہتا ہے، پاکستان بھارت کے درمیان کوئی تنازعہ ہوا تو پوری دنیا کو اپنی لپیٹ میں لے گا۔

 تفصیلات کے مطابق وزیر خارجہ شاہ محمود قریشی نے  امریکی کانگریس میں پاکستانی کوکس کمیونٹی سے ملاقات کی ، ملاقات میں پاکستان سفیر اسد مجید خان ، طاہر جاوید بھی شریک ہوئے۔

ملاقات  میں وزیر خارجہ شاہ محمود قریشی نے کہا کہ عالمی دنیا کو بتا دیا ہے کہ پاکستان تمام معاملات پر بھارت سے مذاکرات کیلئے تیار ہے۔

 وزیر خارجہ نے کہا کہ  بھارت کا شہریت بل بھارتی شہریوں سے مسترد کر دیا ہے، بھارتی اقلیتیں اس وقت شدید مشکلات کا شکار ہیں۔

 شاہ محمود قریشی نے یہ بھی کہا کہ بھارت تاثر دے رہا ہے کہ کشمیر میں حالات معمول پر آچکے ہیں، کشمیر کا معاملہ بھارت کا اندرونی معاملہ نہیں کیونکہ مقبوضہ کشمیر کا معاملہ اقوام متحدہ کی سیکورٹی کونسل میں اٹھایا گیا ہے۔

وزیر خارجہ کا کہنا تھا کہ بھارت کا کشمیر میں ظلم و ستم جاری ہے، کشمیریوں کو بنیادی حقوق سے محروم کیا جارہا ہے جبکہ سیاسی رہنمائوں  اور نوجوانوں کو گرفتار کیا جارہا ہے۔

اقوام متحدہ کے سیکرٹری جنرل سے پاکستان کے وزیر خارجہ کی ملاقات

شاہ محمود قریشی کا یہ بھی کہنا تھا کہ کانگریس اراکین کا جنوبی ایشیا کو دورہ انتہائی ضروری ہے، کانگریس اراکین کو زمینی حقائق جاننے کیلیے جنوبی ایشیا کو دورہ کرنا چاہیے۔

وزیر خارجہ شاہ محمود قریشی کا مزید کہنا تھا کہ پاکستان افغانستان میں امن چاہتا ہےاس لئے طالبان کے ساتھ مذاکراتی عمل میں بھرپور کردار ادا کر رہے ہیں۔

واضح رہے اس سے قبل بھی نیویارک میں اقوام کے سیکرٹری جنرل انتونیوگوتریز سے پاکستان کے وزیر خارجہ شاہ محمود قریشی کی ملاقات ہوئی تھی۔

ملاقات میں وزیرخارجہ نے اقوام متحدہ کے سیکرٹری جنرل کوامریکہ اورایرا ن تنازع کی وجہ سے مشرق وسطیٰ میں پیدا ہونے والی کشیدگی ختم کرانے کے لئے پاکستانی اقدامات سے آگاہ کیا جبکہ مقبوضہ کشمیرمیں انسانی حقوق کی سنگین خلاف ورزیوں کے بارے میں بھی تبادلہ خیال کیا  تھا ۔