وزیرخارجہ مخدوم شاہ محمود قریشی کی  واشنگٹن کیپیٹل ہل میں امریکی سینٹ خارجہ تعلقات کمیٹی کی قیادت سے اہم ملاقات ہوئی۔

امریکی سینٹ کی خارجہ تعلقات کمیٹی کے چئیرمین، ری پبلکن سینیٹر،جم رسچ اور کمیٹی کے سینئر رکن ڈیموکریٹک سینیٹر باب میننڈز نے وزیر خارجہ شاہ محمود قریشی کا کیپیٹل ہل آمد پر خیرمقدم کیا۔

دوران ملاقات، پاک امریکہ دوطرفہ تعلقات، علاقائی صورتحال، افغان امن عمل اور مشرق وسطیٰ میں پیش آنے والے حالیہ واقعات کے حوالے سے تفصیلی تبادلہ ء خیال کیا گیا جبکہ امریکی  سینٹ خارجہ تعلقات کمیٹی کی قیادت نے شاہ محمود قریشی کی رائے سے اتفاق کرتے ہوئے،  علاقائی محاذوں پر مشترکہ اہداف کے حصول کیلئے دو طرفہ تعاون کو آگے بڑھانے کی ضرورت پر زور دیا۔

وزیر خارجہ نے مقبوضہ جموں وکشمیر کے ظالمانہ محاصرے وبندشوں اور اس کے نتیجے میں خطے کی سلامتی کے لئے مضمرات سے امریکی سینٹ کے اراکین کو آگاہ کیا۔

پاکستان خطے میں امن چاہتا ہے، شاہ محمود قریشی

اس موقع پر امریکہ کی صدارت کے لئے سابق ری پبلکن امیدواراور سینٹ خارجہ تعلقات ذیلی کمیٹی برائے ایشیاء کے چئیرمین سینیٹر مٹ رامنی اور ذیلی کمیٹی کے سینئر رکن ڈیموکریٹک سینیٹر کرس مرفی بھی موجود تھے۔

وزیر خارجہ نے خطے میں قیام امن کے لئے امریکہ کے ساتھ مل کر مشترکہ کاوشیں بروئے کار لانے کے عزم کا اظہارکیا اور کہا کہ پاک- امریکہ تعلقات کی تاریخ دونوں ممالک کے مل کر کام کرنے کی قدر و اہمیت کی شاہد ہے۔

شاہ محمود قریشی نے کہا کہ جنوبی ایشیاء میں امن واستحکام اس وقت تک ممکن نہیں ہوگا جب تک تنازعہ ء کشمیر، عالمی قوانین اور کشمیری عوام کی امنگوں کے مطابق حل نہیں ہو جاتا

وزیرخارجہ مخدوم شاہ محمود قریشی  نے مزید کہا کہ مشرق وسطی میں کشیدگی کو ختم کرنے کے لئے پاکستان کے کردار کا حوالہ دیتے ہوئے وزیر خارجہ نے کہاکہ ”پاکستان امن کے ساتھ ہے اور ہم امن کے فروغ اور اس میں سہولت کاری کے لئے جوبھی ممکن ہوسکا، کریں گے۔“