جنوبی افریقہ میں جاری آئی سی سی انڈر 19 ورلڈ کپ 2020 میں پاکستان  ٹیم اپنے سفر کا آغاز اسکاٹ لینڈ کے خلاف میچ سے کرے  گی ۔

تفصیلات کے مطابق دونوں ٹیموں کے درمیان میچ 19 جنوری بروز اتوار کو پوچیف اسٹروم کے نارتھ ویسٹ یونیورسٹی اسپورٹس ویلج گراؤنڈ میں کھیلا جائے گا۔

گروپ سی میں شامل پاکستان انڈر 19 کرکٹ ٹیم 22 اور 24 جنوری کو بالترتیب زمبابوے اور بنگلہ دیش کے مدمقابل آئے گی، دونوں ٹیموں کے خلاف میچز بھی پوچیف اسٹروم میں ہی کھیلے جائیں گے ۔

گروپ سی میں ٹاپ کرنے کی صورت میں قومی انڈر 19 کرکٹ ٹیم ایونٹ کے دوسرے مرحلے میں گروپ ڈی کی رنرزاپ ٹیم کے خلاف میدان میں اترے گی۔

سپر لیگ کوارٹر فائنل مرحلے کا تیسرا میچ 30 جنوری کو پوچیف اسٹروم میں کھیلا جائے گا البتہ گروپ سی میں رنرزاپ رہنے کی صورت میں قومی انڈر 19 ٹیم کو گروپ ڈی میں ٹاپ کرنے والی ٹیم سے میچ کھیلنا ہوگاجو31 جنوری کو بینونی میں ہوگا۔

ایونٹ کے دونوں سیمی فائنلز اور فائنل بھی پوچیف اسٹروم میں ہی کھیلے جائیں گے۔شیڈول کے مطابق سپر لیگ سیمی فائنلز 4 اور 6 فروری کو جبکہ فائنل 9 فروری کو ہوگا۔

آئی سی سی انڈر 19 ورلڈ کپ میں پاکستان کے نوجوان کھلاڑیوں  نے  شاندار کارکردگی دکھانے  کے عزم کا اظہار کیا ہے۔

پاکستان بمقابلہ بنگلہ دیش ، ٹکٹوں کی قیمت مقرر

اس حوالے سے قومی انڈر 19 ٹیم کے کپتان روحیل نذیر کا کہنا ہے کہ نوجوان کرکٹرز ایونٹ میں متاثر کن کارکردگی کا مظاہرہ کرکے اعلیٰ سطحی کرکٹ میں پاکستان کی نمائندگی کرسکتے ہیں۔

روحیل نذیر کا کہنا ہے کہ اسکواڈ میں شامل ہر کھلاڑی بہت پر جوش ہے۔ پاکستان انڈر 19 کرکٹ ٹیم گذشتہ 8 ماہ سے میگا ایونٹ کی تیاریوں میں مصروف ہے۔اسکاٹ لینڈ کے خلاف عمدہ کارکردگی کا مظاہرہ کریں گے۔

انہوں نے کہا کہ  ہیڈ کوچ اعجاز احمد کی موجودگی قومی انڈر 19 اسکواڈ کے لیےحوصلہ افزائی کا سبب ہے۔

کپتان قومی انڈر 19 ٹیم نے کہا کہ میگا ایونٹ میں شرکت سےنوجوان کھلاڑیوں کو اپنی صلاحیتوں کا لوہا منوانے کا موقع ملے گا۔

واضح رہے کہ اس سے قبل قومی انڈر 19 کرکٹ ٹیم گذشتہ سال جون/جولائی میں جنوبی افریقا کا کامیاب دورہ کرچکی ہے۔

میگا ایونٹ کی تیاریوں کی غرض سے ترتیب دی گئی سیریز میں پاکستان انڈر 19 کرکٹ ٹیم نے میزبان ٹیم کے خلاف  0-7  سے کلین سوئپ کیا تھا۔

پاکستان انڈر 19 کرکٹ ٹیم نے میگا ایونٹ سے قبل دو وارم اپ میچز میں شرکت کی، جہاں قومی انڈر 19 کرکٹ ٹیم،  نائیجیریا اور سری لنکا کو بالترتیب 9 اور 4 وکٹوں سے شکست دینے میں کامیاب رہی ہے۔

یاد رہے کہ پاکستان دو مرتبہ آئی سی سی انڈر 19 ایونٹ کا چیمپئن اور تین مرتبہ رنرزاپ رہ چکا ہے۔ پاکستان نے 2004 اور 2006 میں لگاتار دو مرتبہ ٹائٹل اپنے نام کیا تھا۔