سیلاب سے متاثرہ علاقوں میں پی پی پی کی قیادت والی سندھ حکومت کی غیر موجودگی واضح ہے

پاکستان پیپلز پارٹی (پی پی پی) کی سندھ پر 2008 سے حکومت ہے جب کہ اب وہ مرکز میں بھی مخلوط حکومت کا حصہ ہے۔ پاکستان پیپلز پارٹی نے 24 اگست کو موسلا دھار بارشوں اور سیلاب سے خاص طور پر بلوچستان، سندھ اور جنوبی پنجاب میں ہونے والی تباہی کے پیش نظر بین الاقوامی مدد کی اپیل کی تھی.

تاہم جس پارٹی کے نظریات رکھنے والی وفاقی وزیر برائے موسمیاتی تبدیلی شیری رحمان پاکستان پر موسمیاتی تبدیلیوں کے اثرات پر فکر انگیز لیکچر دے رہی ہیں، وہ اپنی سیاسی طاقت کے گڑھ میں عوام کی مدد کرنے میں بری طرح ناکام رہی ہے۔

یہ سچ ہے کہ سندھ ملک کے دیگر حصوں کی طرح موسلا دھار مون سون کے ایک بے مثال موسم سے گزر رہا ہے، تاہم سندھ حکومت کی زمینی سطح پر تقریباً مکمل عدم موجودگی سب کے سامنے نمایاں ہے اور اس نے صوبے کے لوگوں کو اس بحران کے دوران اپنا بچاؤ خود کرنے کے لیے چھوڑ دیا ہے۔

خشک سالی جیسی صورتحال کے بعد جولائی کے اوائل میں صوبے میں مون سون کا آغاز ہوا تو صوبے کے عوام نے راحت کا سانس لیا تھا۔تاہم محکمہ موسمیات کی جانب سے الرٹ جاری کرنے کے باوجود صوبائی حکام بارشوں سے نمٹنے کے لیے تیار نہیں تھے جس کی وجہ سے نکاسی آب کے نظام میں رکاوٹ کی وجہ سے متعدد شہری بستیاں زیر آب آ گئیں۔

سکھر سمیت کئی شہروں کے نشیبی علاقوں میں پانی گھروں اور دکانوں میں داخل ہوگیا جس سے لاکھوں روپے کا نقصان ہوا۔ بارش سے صوبائی دارالحکومت کراچی سمیت کئی شہروں کی اہم سڑکوں پر پانی کھڑا ہوگیا۔

اس افراتفری کے باوجود سندھ حکومت جو کہ بلدیاتی خدمات بھی چلاتی ہے بلدیاتی حکومتوں کی عدم موجودگی کے باعث حرکت میں نہیں آئی اور کروڑوں روپے کی لاگت سے بننے والی سڑکوں کو دھو کر کچی سڑکوں میں تبدیل ہونے دیا گیا۔

سندھ حکومت کی اس غفلت اور لاپرواہی کے دوران جاری مون سون کے مختلف وقفوں کے دوران رہائشی یونٹس اور انفراسٹرکچر کے گرنے، بجلی گرنے، آسمانی بجلی گرنے اور سیلاب کی وجہ سے لوگ مرتے رہے۔

سرکاری اندازوں کے مطابق سندھ کے مختلف مقامات پر بارش سے متعلقہ واقعات میں اب تک 100 سے زائد افراد ہلاک ہو چکے ہیں۔ جیسے ہی مون سون جاری رہا، دریائے سندھ کے پانی نے بھی اپنے کناروں سے باہر آنا شروع کر دیا، جس سے کھیت اور انسانی بستیاں تباہ ہو گئیں اور سکھر بیراج پر بھی پانی خطرناک حد سطح تک پہنچ گیا۔جب سندھ کے تیسرے بڑے شہر سکھر کے لوگ خراب موسم اور ضلعی اور میونسپل حکام کی نا اہلی کا خمیازہ بھگت رہے تھے تو انہوں نے یہ ’خوشخبری‘ سنی کہ وزیراعلیٰ سندھ مراد علی شاہ سکھر سمیت سندھ کے مختلف اضلاع کا دورہ کرنے والے ہیں۔

طوفانی بارشوں کے باعث پیرزادہ محلہ، تانگہ اسٹینڈ، حیدری مسجد روڈ، نیو پنڈ، گھنٹہ گھر چوک، پان منی، نشتر روڈ، ڈھک روڈ، بیراج روڈ، مہران سینٹر اور وکٹوریہ مارکیٹ سمیت شہر کے 20 محلے تاحال زیرآب ہیں۔

شہر کے لوگوں کو بجلی کی شدید بندش کا بھی سامنا کرنا پڑا۔

لوگوں نے امید ظاہر کی کہ حکام بالاآخر دورے سے قبل اس گندے پانی کی نکاسی کے لیے کوئی کوشش کریں گے۔ وزیراعلیٰ مراد علی شاہ نے بارشوں اور سیلاب زدگان کی امداد میں غفلت برتنے والے سرکاری افسران کے خلاف کارروائی کا اعلان کیا تھا۔

تاہم ضلعی حکام کے پاس کچھ اور منصوبے تھے کیونکہ انہوں نے اس بات کو یقینی بنایا کہ وزیراعلیٰ متاثرہ علاقوں سے دور رہیں۔

انتظامیہ نے کمال ہوشیاری سے وزیراعلیٰ کو سکھر بیراج سے بیگاری بند کا دورہ کرا کر وہاں سے سیدھے صوبائی وزیر کی پوش رہائش پہنچا دیا گیا جہاں وزیر اعلیٰ سندھ نے رات گزاری۔

مراد علی شاہ نے موسلا دھار بارشوں اور سیلاب سے متاثر ہونے والے کچھ لوگوں سے ملاقات کی لیکن اگلے دن شکارپور اور لاڑکانہ کے لیے شہر کے ان علاقوں کا دورہ کیے بغیر روانہ ہو گئے جو تقریباً ایک ماہ سے خستہ حالت میں تھے۔

پیرزادہ محلہ کے رہائشی علی کاظمی نے کہا کہ ان علاقوں میں رہنے والے لوگوں کی اکثریت اپنے رشتہ داروں کے گھروں میں منتقل ہو گئی ہے کیونکہ ان کے علاقے میں کئی فٹ پانی تا حال موجود ہے۔ بعض مقامات پر لوگوں کو دوسری جگہوں پر جانے کے لیے کشتیوں کا استعمال کرنا پڑا، لیکن شہر کی انتظامیہ خاموش تماشائی کی طرح کام کر رہی ہے۔

ایشیا کی سب سے بڑی خشک کھجور منڈی کے تاجر بھی انتظامیہ کی مدد کے منتظر تھے لیکن روہڑی کی میونسپل انتظامیہ نے طوفانی پانی کے نالوں کو صاف کرنے کی کوشش تک نہ کی اور سکھر کی سوکھی کھجور کی منڈی میں کھڑی کھجوروں کی سینکڑوں بوریاں تلف ہو گئیں۔ .

بعض مقامات پر خشک کھجور کے گوداموں میں پانی داخل ہوگیا جس سے گھنٹہ گھر چوک، نشتر روڈ اور مہران مرکز کے تاجروں کو بھاری نقصان اٹھانا پڑا۔نشتر روڈ، گھنٹہ گھر چوک اور دیگر بازاروں میں تاجروں نے انتظامیہ کی نااہلی کے خلاف احتجاج کیا اور سندھ حکومت کے خلاف نعرے بازی کی۔

بارشوں، سیلاب اور حکومتی بے حسی کے نتیجے میں صالح پت، روہڑی اور کندھارا کے علاقوں میں بھی بڑے پیمانے پر تباہی ہوئی۔ بچل شاہ میانی میں درجنوں مکانات گر گئے اور روہڑی کے علاقے علی واہن میں سولنگی برادری کا ایک پورا گاؤں صفحہ ہستی سے مٹ گیا۔

تاہم جہاں سندھ حکومت اور ضلعی انتظامیہ لوگوں کو امداد فراہم کرنے میں ناکام رہی، وہیں پاکستان آرمی، پاک فضائیہ اور پاک بحریہ کے دستوں کے ساتھ ساتھ سندھ پولیس نے سیلاب زدہ علاقوں میں لوگوں کو نکالنے کے لیے بہت کچھ کیا۔

ایک تاجر ماجد آرائیں نے کہا کہ ایسا لگتا ہے کہ سندھ حکومت نے سکھر کو چھوڑ دیا ہے۔

ماجد آرائیں کا کہنا تھا کہ حکام نے کچھ نہیں کیا، کسی نے نکاسی آب کے نظام کو کھولنے کی کوشش نہیں کی۔ مختلف مقامات پر نصب پمپس کو کسی نے استعمال نہیں کیا، صحت عامہ کا عملہ کہیں نظر نہیں آرہا تھا اور ایسا لگ رہا تھا کہ سندھ میں حکومت نہیں ہے اور لوگوں کو حالات کے رحم و کرم پر چھوڑ دیا گیا ہے۔

سکھر اسمال ٹریڈرز ایسوسی ایشن کے حاجی شریف دادا نے کہا کہ یہ درست ہے کہ اس مون سون میں بہت بارش ہوئی ہے لیکن اگر انتظامیہ اپنا کام کرتی تو عوام کو اتنی پریشانی کا سامنا نہ کرنا پڑتا۔ انہوں نے کہا کہ بازاروں اور مارکیٹس میں پانی جمع ہونے سے لوگ بے گھر ہو گئے۔حاجی شریف دادا نے کہا کہ تاجروں اور دکانداروں کو شدید نقصان اٹھانا پڑا لیکن سندھ حکومت یا انتظامیہ نے کیا کیا؟ حکومت اور انتظامیہ نے صرف لب کشائی کی اس کے علاوہ کچھ نہیں کیا۔ایک سماجی رہنما سید احسن شاہ کا کہنا تھا کہ بارشوں نے صالح پٹ کے صحرائی علاقے میں اتنی تباہی مچائی کہ اسے الفاظ میں بیان نہیں کیا جا سکتا۔

سید احسن شاہ کے مطابق غریب لوگ بے گھر ہو گئے ہیں، حکومت متاثرین کو امداد فراہم کرے اور سرکاری امداد کی تقسیم کے عمل کو منصفانہ بنائے تاکہ لوگ اپنے پاؤں پر کھڑے ہو سکیں۔