سابق کپتان محمد حفیظ نے شاہین شاہ کو آرام نہ کروانا مجرمانہ فعل قرار دے دیا ہے۔

پاکستان کرکٹ ٹیم کے سابق کپتان محمد حفیظ کا کہنا ہے کہ شاہین شاہ کے حوالے سے مجھے بہت تکلیف ہوئی ہے کیونکہ وہ صرف پاکستان کا ہی نہیں بلکہ دنیا کا بہترین پروڈکٹ ہے۔

انہوں نے کہا کہ شاہین شاہ تیار ہورہے ہیں اور دنیا انہیں دیکھنا چاہتی ہے، ہمیں ان کی مکمل دیکھ بھال کرنی چاہیے۔ شاہین شاہ کے حوالے سے جو رپورٹ آئی ہیں انہیں دیکھتے ہوئے شاہین کو 4 سے 6 ہفتے مکمل آرام کا موقع دینا چاہیے تھا جو نہیں دیا گیا۔

محمد حفیظ کہتے ہیں کہ یہ ایک مجرمانہ فعل ہے اور ہمیں اس ضرور دیکھنے کی ضرورت ہے، اب انہیں انگلینڈ بھیجنے کا فیصلہ کیا گیا ہے جب کہ دو ہفتے پہلے ہی یہ فیصلہ کرلینا چاہیے تھا۔

https://twitter.com/MHafeez22/status/1564634875675680769

واضح رہے کہ قومی ٹیم کے اہم فاسٹ بولر شاہین شاہ آفریدی گال ٹیسٹ میں فیلڈنگ کے دوران گھٹنے کی انجری کا شکار ہوئے تھے جس کے بعد ڈاکٹرز نے انہیں مکمل آرام کرنے کا مشورہ دیا تھا۔

تاہم آرام نہ کرنے کی وجہ سے ان کے گھٹنے کی تکلیف بڑھ گئی تھی جب کہ انہیں آرام دینے کی بجائے نیدرلینڈز بھیج دیا گیا تھا جہاں وہ کوئی میچ بھی نہیں کھیل سکے تھے۔

رپورٹ کے مطابق شاہین شاہ کے معاملے میں غفلت سے کام لیا گیا ہے کیونکہ اگر انہیں پہلے ہی آرام کروایا جاتا تو ایشیاکپ سے قبل وہ فٹ ہوسکتے تھے۔

ماہرین کا خیال ہے کہ لیگمنٹ کے کھنچاؤ میں 4 سے 6 ہفتے مکمل آرام کی ضرورت ہوتی ہے جوکہ شاہین شاہ سے نہیں کروایا گیا جس کی وجہ سے اب صورت حال باعث تشویش ہے۔

تاہم اب کرکٹ بورڈ نے شاہین شاہ کو انجری سے مکمل نجات حاصل کرنے کے لیے انگلینڈ بھیج دیا ہے، جہاں وہ اپنا ری ہیب مکمل کریں گے۔