پاکستان قومی کرکٹ ٹیم کے چیف سلیکٹر محمد وسیم کے لیے گرین شرٹس کی سلیکشن پریشانی کا باعث بن گئی ہے۔

نجی میڈیا رپورٹس کے مطابق چیف سلیکٹر کے لیے ٹیم سلیکشن دہکتا انگارہ بن چکی ہے۔

رپورٹس میں بتایا گیا ہے کہ ایشیا کپ کے فائنل میں سری لنکا کے ہاتھوں شکست کے بعد سلیکٹرز پریشان ہیں کہ انگلینڈ سیریز، دورہ نیوزی لینڈ اور آئی سی سی ٹی ٹوئنٹی ورلڈ کپ کے لیے قومی ٹیم میں کن کھلاڑیوں کا شامل کیا جائے اور کن کھلاڑیوں کو ڈراپ کیا جائے۔

ذرائع کے مطابق ایشیا کپ میں سپر فور اور فائنل میں سری لنکا کے خلاف شکست کے بعد کھلاڑیوں کی پرفارمنس کے حوالے سے دوبارہ مشاورت کا فیصلہ کیا جائے گا، جس میں بعض کھلاڑیوں کی سلیکشن کے حوالے اہم فیصلے کئے جائیں گے۔

میڈیا رپورٹس کے مطابق آصف علی، فخر زمان اور خوشدل شاہ کی ٹیم میں جگہ خطرے میں پڑ چکی ہے۔

نجی میڈیا کے مطابق فائنل میں شکست اور کھلاڑیوں کی ناقص کارکردگی کے باعث سلیکٹرز کی نگاہیں شان مسعود پر ٹکی ہیں جو اس وقت شاندار فارم میں ہیں۔

نجی میڈیا کی رپورٹس میں بتایا گیا ہے کہ سلیکشن کمیٹی نے ممکنہ کھلاڑیوں کا انتخاب مکمل کر لیا تھا اور مجوزہ پروگرام کے مطابق قومی ٹیم کا اعلان منگل کو ہونا تھا لیکن سری لنکا کے خلاف دو میچوں میں شکست نے پورے پلان پر پانی پھیر دیا۔

چیف سلیکٹر محمد وسیم نے ایشیا کپ کا فائنل ساتھی سلیکٹرز کے ساتھ ملتان میں دیکھا، جہاں وہ نیشنل ٹی ٹوئنٹی ٹورنامنٹ کا جائزہ لینے گئے ہیں۔

ذرائع کے مطابق چیف سلیکٹرز محمد وسیم سلیکٹرز سے ابتدائی بات چیت کے بعد لاہور واپس آگئے ہیں۔ وہ کپتان بابر اعظم اور ہیڈ کوچ ثقلین مشتاق کی واپسی کا انتظار کر رہے ہیں تاکہ ٹیم میں ہونے والی تبدیلیوں پر ان سے مشاورت کی جا سکے۔

نجی میڈیا رپورٹ کے مطابق چیف سلیکٹر شاہین شاہ آفریدی کی فٹنس رپورٹ کا انتظار کر رہے ہیں، مجوزہ ٹیم سلیکشن میں شاہین شاہ آفریدی کا نام سرفہرست ہے۔

واضح رہے کہ انگلینڈ کی ٹیم سات ٹی ٹونٹی میچز کے لیے 15 ستمبر کو کراچی پہنچ رہی ہے جب کہ پی سی بی کو 15 ستمبر سے قبل آئی سی سی ورلڈ کپ کے لیے ٹیموں کا اعلان کرنا ہے۔

ذرائع کا کہنا ہے کہ ایشیا کپ میں شکست کے بعد ہونے والی تنقید سے بچنے کے لیے سلیکشن کمیٹی اب ایسے کھلاڑیوں کو موقع دینا چاہتی ہے جو آسٹریلیا کی کنڈیشنز میں بہتر کارکردگی دکھا سکیں۔