عدالت نے وزیراعظم شہبازشریف کے بیٹے سلمان شہبازکی 8 کمپنیوں کے اکاؤنٹ بحال کرنے کا حکم دے دیا۔ 

تفصیلات کے مطابق اسپیشل کورٹ سنٹرل نے کمپنی ملازمین کی تنخواہوں کی ادائیگی کیلئے منجمد اکائونٹ بحالی کی استدعا منظورکرتے ہوئے سلمان شہبازکی 8 کمپنیوں کے اکاؤنٹ بحال کرنے کا حکم دیا۔

سنٹرل کورٹ کے جج اعجاز حسن اعوان نے شہبازفیملی کے خلاف منی لانڈرنگ سے متعلق کیس پرسماعت کی۔

نوکمپینیز کی جانب سے اکاؤنٹ ڈی فریز کرنے کی درخواستیں دائر کی گئی تھی۔

درخواست گزارنے مؤقف پیش کیا کہ کمپنیوں کے اکاؤنٹ مشترکہ ہیں منی لانڈرنگ کیس میں اشتہاری سلمان شہبازکا ان اکاؤنٹس سے براہ راست کوئی تعلق نہیں۔ مدنی ٹریڈرز، شریف پولٹری، چنیوٹ پاور، کرسٹل الیکٹرک، شریف فیڈ سمیت دیگرکے اکائونٹس بلاجواز منجمد کیے گئے۔

درخواست میں عدالت سے استدعا کی گئی کہ ملازمین کی تنخواہوں کی ادائیگیوں اور روزانہ کے کاروباری معاملات چلانے کیلئے منجمد اکائونٹس بحال کئے جائیں۔

عدالت نے شہبازشریف اورحمزہ شہبازکی ایک روزہ حاضری معافی کی درخواستیں بھی منظورکیں اور آئندہ سماعت پر ملزموں کی بریت کی درخواستوں پر دلائل طلب کرلیے۔

عدالت نے 30 ستمبرکو وزیراعظم شہباز شریف سمیت دیگر ملزموں کو فرد جرم کی کارروائی کیلئے بھی طلب کرلیا۔

اس سے قبل لاہوراسپیشل کورٹ سینٹرل نے شہبازشریف اورحمزہ شہباز کے خلاف منی لانڈرنگ مقدمے کی سماعت ڈیڑھ بجے تک ملتوی کردی تھی۔ جن ملزمان کی حاضری مکمل ہو گئی انہیں عدالت سے جانے کی اجازت مل گئی۔

اسپیشل جج سنٹرل اعجازحسن اعوان کی عدالت میں وزیراعظم شہباز شریف اور حمزہ شہباز عدالت میں پیش نہیں ہوئے۔

وکیل شہبازشریف نے عدالت کو بتایا کہ شہبازشریف سرکاری دورے پر ہیں اس لیے عدالت پیش نہیں ہو سکے جبکہ وکیل حمزہ شہباز نے کہا کہ حمزہ شہبازکی طبیعت خراب ہے ڈاکٹر کی رپورٹس بھی پیش کردی ہیں۔

وکلا نے عدالت سے استدعا کی کہ شہباز شریف اور حمزہ شہباز کی آج کی حاضری معافی کی درخواست منظورکی جائے۔

سماعت کے دوران بنک افسران رپورٹس سمیت عدالت میں پیش ہوئے اوررپورٹ عدالت میں جمع کرائی۔

گزشتہ سماعت پرعدالت نے سلمان شہباز کے اکاؤنٹ منجمند نہ کرنے پر بنک افسران کو شوکازنوٹس جاری کیے تھے۔