حافظ حمداللہ نے کہا ہے کہ الیکشن اکتوبر 2023 میں اپنے مقررہ وقت پر ہونگے۔

تفصیلات کے مطابق ترجمان پی ڈی ایم حافظ حمداللہ نے اپنے ایک بیان میں کہا کہ عمران خان ملک میں سیاسی بحران پیدا کرنے کی ناپاک کوشش کررہا ہے۔

حافظ حمداللہ نے کہا کہ ستمبر میں مارچ کی کال اسی ناپاک ایجنڈے کا حصہ ہے، مارچ لانگ ہو یا شارٹ یا کوئیک ،یہ ٹھس مارچ ثابت ہوگا۔

ترجمان پی ڈی ایم نے یہ بھی کہا کہ آرمی چیف کی تقرری کا فیصلہ وزیراعظم کی صوابدید ہے جو طے بشدہ طریقہ کار کے مطابق ہوگا۔

ان کا کہنا تھا کہ فیصلے عمران خان کی خواہش پر نہیں آئین اورقانون کے مطابق ہونگے جبکہ الیکشن بھی اکتوبر 2023 میں اپنے مقررہ وقت پر ہونگے۔

حافظ حمداللہ کا یہ بھی کہنا تھا کہ سپریم کورٹ اور الیکشن کمیشن کے فیصلوں کے مطابق تم سر ٹیفائیڈ بددیانت آئین شکن جھوٹے اور انٹرنیشنل منی لانڈرر ثابت ہوچکے ہو۔

انہوں نے کہا کہ تم پارٹی سمیت امپورٹڈ بیرونی فنڈڈ اور ایڈڈ ثابت ہوچکے ہو ،تم صادق اور امین نہیں رہے اور اگر تم واقعی ملک میں الیکشن چاہتے ہو تو پنجاب اسمبلی اور کے پی کے اسمبلی توڑدیں۔

ترجمان پی ڈی ایم حافظ حمداللہ نے مزید کہا کہ آپ کو بکنے، بھونکنے ، پیٹنے ،چیخنے، بھڑکیں اور دھونس دھمکیوں سےکچھ نہیں ملے گا۔