سربراہ جمعیت علماء اسلام مولانا فضل الرحمان کا کہنا ہے کہ آڈیو لیک کے خلاف سخت ایکشن ہونا چاہیے۔

مولانا فضل الرحمان نے ملتان میں میڈیا سے گفتگو کرتے ہوئے کہا کہ آڈیو کا لیک ہونا انتہائی تشویشناک ہے، وزیر اعظم سے کہوں گا سخت ہاتھ ڈالے۔

‘عمران خان نے ساری سیاست کرپشن پر کی’

فضل الرحمان نے کہا کہ اسحاق ڈار کے آنے کے حوالے سے میرے ساتھ کوئی رابطہ نہیں ہوا، ان کے تجربے سے فائدہ اٹھانا چاہیے۔

انہوں نے کہا کہ دفاعی قوت دوسرے درجے کی چیز ہے، چائنا ہم سے ناراض ہوگیا ہے، سی پیک چائنا کی بہت بڑی انویسٹمنٹ تھی۔

مولانا فضل الرحمان نے کہا کہ عمران حکومت نے سی پیک منصوبے کو رول بیک کیا، انہوں نے ہمارے ملک کے اسٹیٹ بینک کو آئی ایم ایف کو دے دیا، انہوں نے ساری سیاست کرپشن پر کی۔

‘عمران حکومت نے سی پیک کے خفیہ معلومات امریکا کو دیئے’

انکا کہنا ہے کہ عمران خان نے اداروں اور پسیوں کو بھی ضائع کیا، عمران خان حکومت نے سی پیک کے خفیہ معلومات امریکا کو دیئے، پچھلی حکومت نے سی پیک پر کام روکا جس پر چین ناراض ہوا۔

سربراہ جمعیت علماء اسلام نے کہا کہ سابق وزیر خزانہ شوکت ترین کی آڈیو وائرل ہوئی، شوکت ترین چاہتا ہے پاکستان ڈیفالٹ ہوجائے۔

‘عمران خان پاگلوں کی طرح گلی گلی گھومتے ہیں’

انہوں نے کہا کہ ہم نے ان کی حکومت گرا دی تو ان کا ایجنڈا مکمل نہ ہوا، عمران خان پاگلوں کی طرح گلی گلی گھومتے ہیں۔

مولانا فضل الرحمان نے مزید کہا کہ کاغذ لہرا کر عمران خان نے کہا میرے خلاف سازش ہوئی، عمران خان بتائے وہ ایکس وائی زیڈ کون ہے۔

سربراہ جمعیت علماء اسلام نے مزید کہا کہ انڈیا اسرائیل سے آئی فنڈنگ ثابت ہوچکی ہے، عمران خان نااہل ثابت ہوئے، یہ ہر بات میں جھوٹے ثابت ہوئے۔