آج ہم آپ کو بتانے جارہے ہیں قومی ٹیم میں ڈیبیو کرنے والے آل راؤنڈر عامر جمال کی زندگی سے متعلق دلچسپ راز۔

انگلینڈ کے خلاف پانچویں ٹی ٹوئنٹی میچ میں پاکستان کی جانب سے انٹرنیشنل کرکٹ میں ڈیبیو کرنے والے عامر جمال کا تعلق میانوالی کے گاؤں کلور شریف سے ہے۔

26 سالہ عامر جمال کا تعلق ایک سرائیکی گھرانے سے ہے جب کہ ان کی والدہ پٹھان ہیں، عامر جمال کے والد کا تعلق ٹرانسپورٹ سے ہے اور وہ عامر جمال کو بھی اپنے ہی کاروبار سے منسلک دیکھنا چاہتے تھے۔

لیکن کرکٹ کو جنون کی حد تک پسند کرنے والے عامر جمال نے ٹھان لیا تھا کہ وہ ایک کرکٹر بن کر رہیں گے اور اللہ کی مدد سے قومی ٹیم میں ڈیبیو کرنے کے بعد انہوں نے اپنا خواب بھی پورا کرلیا ہے۔

غیر ملکی خبر رساں ادارے سے گفتگو کرتے ہوئے عامر جمال کا کہنا تھا کہ ’ان کے والد نے کہہ دیا تھا کہ یا تو پڑھائی کرو یا پھرکام میں ہاتھ بٹاؤ‘۔

عامر جمال کہتے ہیں جب میں نے اپنے والد سے کرکٹ کھیلنے کی خواہش کا اظہار کیا تو انہوں نے سختی سے منع کردیا لیکن میرے دماغ پر تو ہر طرف کرکٹ چھائی ہوئی تھی۔

آؒل راؤنڈر کا کہنا تھا کہ 2010 میں جب دوستوں کے ساتھ اسلام آباد سیرو تفریح کے لیے آٰیا تو ہارڈ بال نے مجھے اپنی جانب متوجہ کیا جب کہ اس سے قبل وہ میانوالی میں شوقیہ ہی کرکٹ کھیلا کرتے تھے۔

انہوں نے انٹرویو میں بتایا کہ اسلام آباد میں انہوں نے ہارڈ بال کرکٹ کھیلنا شروع کی جب کہ والد کے منع کرنے کے بعد وہ اسلام آباد آگئے اور یہی سے انہوں نے باقاعدہ کرکٹ کھیلنے کا آغاز کیا۔

واضح رہے کہ عامر جمال نے باقاعدہ کیریئر کا آغاز 2013 میں شروع کیا تھا جس کے بعد وہ اتار چڑھاؤ کا شکار رہے۔

تاہم مقبولیت انہیں حال ہی میں ہونے والے انگلینڈ کے خلاف پانچویں ٹی ٹوئنٹی میچ میں ملی جب انہوں نے پہلے اوور میں ایک وکٹ حاصل کی جب کہ آخری اوور میں انہوں نے تو قوم کے دل ہی جیت لیے تھے۔