واشنگٹن: آرمی چیف جنرل قمر جاوید باجوہ دورہ امریکا مکمل کر کے وطن واپسی کیلئے روانہ ہو گئے ہیں۔

تفصیلات کے مطابق آرمی چیف نے اپنے پانچ روزہ دورہ میں نیویارک اور واشنگٹن میں اہم ملاقاتیں کیں۔

ذرائع کے مطابق آرمی چیف جنرل قمر جاوید باجوہ نے امریکی محکمہ خارجہ کے اہلکاروں کے علاوہ امریکی فوجی قیادت اور سینٹرل کمانڈ سے بھی اہم ملاقاتیں کیں۔

ذرائع نے بتایا کہ جنرل قمر جاوید باجوہ نے دورہ امریکا میں ہونے والی ملاقاتوں میں پاک، امریکا تعلقات میں تجارت، بہتری اور سرمایہ کاری پر زور دیتے ہوئے کہا کہ پاکستان، امریکا کا طویل مدتی شراکت دار رہا ہے۔

واضح رہے کہ گزشتہ روز واشنگٹن میں پاکستانی سفارتخانے میں ظہرانے میں شرکت کے دوران غیر رسمی گفتگو کرتے ہوئے آرمی چیف نے کہا کہ مسلح افواج نے خود کو سیاست سے دور کرلیا ہے اور اسی طرح رہنا چاہتے ہیں۔

آرمی چیف جنرل قمر جاوید باجوہ نے کہا کہ مضبوط معیشت کےبغیرقوم اپنےاہداف حاصل نہیں کرسکے گی اور نہ کوئی سفارتکاری ہوسکتی ہے تاہم بیمار معیشت بحال کرنا تمام طبقات کی اولین ترجیح ہونی چاہیے ۔

امریکی وزیر دفاع کا آرمی چیف سے ملاقات پر بیان

دوسری جانب امریکی وزیر دفاع لائیڈ آسٹن نے آرمی چیف جنرل قمر جاوید باجوہ سے ملاقات پر بیان دیتے ہوئے کہا کہ پاکستانی آرمی چیف کی پینٹاگون میں میزبانی پر خوشی ہے۔

لائیڈ آسٹن نے کہا کہ پاکستانی آرمی چیف سے ملاقات میں دفاعی شراکت داری اور باہمی امور پر بات ہوئی۔

امریکی وزیر دفاع لائیڈ آسٹن نے مزید کہا کہ پاک امریکا تعلقات کے 75 سال منارہے ہیں۔