خیبرپختونخوا حکومت صوبے کے 13 سیلاب سے متاثرہ اضلاع میں کم از کم 14 بیماریوں سے لڑ رہی ہے

جب سے حالیہ مون سون کے سیلاب نے ملک بھر میں تباہی مچائی ہے، پانی سے پیدا ہونے والی متعدد بیماریوں نے خیبرپختونخوا میں صحت کے حکام کی صلاحیتوں کو امتحان میں ڈال دیا ہے۔ صوبے کے کم از کم 13 اضلاع میں مختلف بیماریوں کے 3 لاکھ 83 ہزار 547 سے زیادہ کیسز رپورٹ ہوئے ہیں۔

یکم ستمبر سے، صحت کے اہلکار مستقل صحت کی سہولیات سے اعداد و شمار اکٹھا کر رہے ہیں، جب کہ مشکل رسائی والے علاقوں میں لگائے گئے میڈیکل کیمپوں میں ضلعی صحت کا عملہ 20 اگست سے ڈیٹا فراہم کر رہا ہے۔

حکومتِ خیبرپختونخوا کے ڈائریکٹوریٹ جنرل ہیلتھ سروسز(ڈی جی ایچ ایس) کے پاس دستیاب اعداد و شمار کے مطابق 20 اگست کے بعد لگائے گئے میڈیکل کیمپوں میں کم از کم 2 لاکھ 60 ہزار 883 کیسز رپورٹ ہوئے جبکہ 6 اکتوبر تک سیلاب سے متاثرہ علاقوں میں قائم کیے گئے طبی مراکز میں مزید 1 لاکھ 22 ہزار 664 کیسز رپورٹ ہوئے۔ ڈی جی ایچ ایس صوبے کے 13 سیلاب سے متاثرہ اضلاع میں کم از کم 14 ترجیحی بیماریوں سے نمٹنے کے لیے سخت محنت کر رہا ہے۔

یہ بات قابل غور ہے کہ حالیہ سیلاب سے متاثر ہونے کے باوجود، مذکورہ اعداد و شمار میں سیلاب سے متعلقہ بیماریوں کے حوالے سے مہمند اور خیبر قبائلی اضلاع سے کوئی ڈیٹا شامل نہیں ہے۔

رپورٹس بتاتی ہیں کہ حالیہ سیلابوں میں شدید اسہال صحت کا سب سے عام مسئلہ بن گیا ہے، جیسا کہ اکثر ان علاقوں میں ہوتا ہے جہاں سیلابی پانی کی وجہ سے پینے کا صاف پانی آلودہ ہو جاتا ہے۔ 11 ستمبر اور 3 اکتوبر کے درمیان، کے پی کے صحت کے حکام نے شدید اسہال کے کم از کم 77 ہزار 187 کیسز ریکارڈ کیے۔

خیبرپختونخوا کے جنوبی اضلاع میں سب سے زیادہ کیسز رپورٹ ہوئے، ڈیرہ اسماعیل خان میں 14 ہزار 728 افراد رپورٹ ہوئے، اس کے بعد ٹانک میں 6 ہزار 92 اور لکی مروت میں 5 ہزار 367 افراد رپورٹ ہوئے۔ دریں اثناء چارسدہ میں شدید اسہال کے 12 ہزار 550 کیسز رپورٹ ہوئے، اس کے بعد مالاکنڈ میں 6 ہزار 916 کیسز، نوشہرہ میں 6 ہزار 20 کیسز اور پشاور میں 5 ہزار 871 کیسز سامنے آئے۔

اسی طرح حالیہ ہفتوں میں متاثرہ اضلاع سے خونی اسہال کے 2 ہزار 887 اور شدید پانی والے اسہال کے 4 ہزار 363 کیسز رپورٹ ہوئے ہیں، جن میں سے زیادہ تر دیر لوئر میں واقع ہوئے ہیں۔

مزید برآں، 11 ستمبر کے بعد سے تین ہفتوں میں، شدید سانس کے انفیکشن (ای آر آئی) کے کم از کم 69 ہزار 336 کیسز رپورٹ ہوئے ہیں، جس میں ڈیرہ اسماعیل خان 14 ہزار 60 کیسز کے ساتھ سرفہرست ہے، اس کے بعد چارسدہ 8 ہزار 893 کیسز کے ساتھ اور لوئر دیر 8 ہزار 893 کیسز کے ساتھ دوسرے نمبر پر ہے۔ نوشہرہ اور سوات کے اضلاع میں بالترتیب 7 ہزار 281 اور 5 ہزار 830 اے آر آئی کیس رپورٹ ہوئے۔

جلد کے انفیکشن کے کیسز کی بڑھتی ہوئی تعداد تیسری سب سے عام بیماری ہے جس سے محکمہ صحت سیلاب سے متاثرہ علاقوں میں حالیہ سیلاب کے بعد نمٹ رہا ہے۔ پچھلے تین ہفتوں میں، ڈی جی ایچ ایس نے اس طرح کے 57 ہزار 681 کیس درج کیے ہیں۔ چارسدہ اور ڈیرہ اسماعیل خان کے اضلاع بالترتیب 16 ہزار 78 اور 14 ہزار 671 کیسز کے ساتھ، اس ناپسندیدہ فہرست میں سب سے اوپر ہیں۔ ضلع نوشہرہ میں 5 ہزار 949 کیسز تھے جبکہ ضلع ٹانک میں سیلاب کے بعد سامنے آنے والے جلد کی بیماریوں کے 5 ہزار 949 کیسز تھے۔

مزید برآں آنکھوں کی بیماریوں کے 12 ہزار 576 سے زائد کیسز، ملیریا کے 12 ہزار 33 کیسز، چوٹ لگنے کے 4 ہزار 753 کیسز، ڈینگی کے 2 ہزار 781 مشتبہ کیسز، ٹائیفائیڈ کے 2 ہزار 562 مشتبہ کیسز، ایکیوٹ وائرل ہیپاٹائٹس کے 465 کیسز، خسرہ کے 121 کیسز، سانپ کے کاٹنے کے 79 اور گزشتہ ماہ سیلاب کی وجہ سے دیگر نوعیت کے 79 ہزار 590 کیسز رپورٹ ہوئے ہیں۔

محکمہ صحت کے ترجمان عطا اللہ خان کے مطابق سیلاب کے دوران سانپ کا کاٹنا صحت کے لیے فوری خطرہ تھا لیکن اسہال نے جلد ہی دیگر تمام کیسز کو پیچھے چھوڑ دیا کیونکہ تباہ شدہ واٹر چینل مختلف قسم کی پانی سے پیدا ہونے والی بیماریوں کا شکار ہو گئے تھے۔

محکمہ صحت کے ترجمان نے بتایا، “محکمہ صحت کے پاس ایک مربوط بیماریوں کی نگرانی اور رسپانس سسٹم (آئی ڈی ایس آر ایس) ہے جو بیماریوں کا پھیلاؤ روکنے کے لیے 45 بیماریوں کی معمول کے مطابق جانچ پڑتال کرتا ہے۔ کسی بھی یونین کونسل یا چھوٹے رہائشی علاقے سے پھیلنے والے 10 سے 15 کیسز کو بیماری کے پھیلاؤ کا آغاز تصور کیا جاتا ہے۔ ان کیسس کی روک تھام کے لیے ہم نے موبائل کلینک قائم کیے اور علاقے میں اس کے گردونواح سے آمدورفت معطل کر دی۔ سیلاب کے فوراً بعد، آئی ڈی ایس آر ایس نے مختلف اضلاع میں موبائل کلینک قائم کیے اور ہزاروں لوگوں کو ہنگامی طبی علاج فراہم کیا۔”

درپیش مشکلات کے بارے میں بتاتےہوئے عطاء اللہ خان نے کہا کہ اگرچہ مالاکنڈ، دیر، چارسدہ اور نوشہرہ جیسے کچھ علاقوں تک پہنچنا نسبتاً آسان تھا، لیکن صحت کی ٹیموں کو بالائی اور زیریں کوہستان جیسے مقامات پر فوری علاج کے منتظر ہزاروں افراد تک پہنچنے میں مشکلات کا سامنا کرنا پڑا۔

انہوں نے مزید کہا، “کوہستان کے دو اضلاع کا ملک کے باقی حصوں سے مکمل رابطہ منقطع ہو گیا تھا۔ تاہم، اپر کوہستان کے ڈسٹرکٹ ہیلتھ آفیسر کی تجویز کی بدولت، ہنگامی ادویات کو ہیلی کاپٹر کی مدد سے علاقے میں پہنچا دیا گیا، ہر ریسکیو مشن پر جانے والا ہیلی کاپٹر اپنے ساتھ زیادہ سے زیادہ ادویات وہاں پھنسے ہوئے لاکھوں لوگوں کے لیے ساتھ لے گیا تھا۔”

ترجمان کے مطابق، عالمی ادارہ صحت (ڈبلیو ایچ او) اور اقوام متحدہ کے بین الاقوامی چلڈرن ایمرجنسی فنڈ (یونی سیف) نے بھی بہت سے شعبوں میں بروقت طبی امداد فراہم کرنے میں انتہائی ضروری تعاون فراہم کیا ہے۔

عطا اللہ خان نے وضاحت کی، “ڈبلیو ایچ او نے دو ٹائیفائیڈ کنجوگیٹ ویکسین (ٹی سی وی) مہمات کے لیے 30 لاکھ ویکسین فراہم کی ہیں، جو 10 سے 14 اکتوبر اور 17 سے 21 اکتوبر تک سات اضلاع کی 13 یونین کونسلوں میں لگائی جائیں گی۔ سوات اور ڈیرہ اسماعیل میں گاڑیاں فراہم کرنے کے علاوہ، دونوں تنظیموں نے کئی اضلاع میں ہنگامی ادویات بھی فراہم کی ہیں،”

محکمہ صحت کے ترجمان نے مزید کہا، “یونیسیف اور ڈبلیو ایچ او نے آفت زدہ علاقوں میں ضرورت مندوں کو صحت کی خدمات فراہم کرنے کے لیے خیمہ اسپتال بھی قائم کیے ہیں۔ ابتدا میں، زیادہ لوگوں کا موبائل کیمپوں اور خیمہ اسپتالوں میں علاج کیا جاتا تھا۔ بہت سے لوگ ان سہولیات میں منتقل ہو گئے ہیں۔”

انہوں نے مزید کہا کہ محکمہ صحت سیلاب سے متاثرہ علاقوں میں ماں اور نوزائیدہ بچوں کی صحت کی دیکھ بھال بھی فراہم کر رہا ہے جبکہ لیڈی ہیلتھ ورکرز وہاں صحت کے مراکز کے کثرت سے دورے کرتی ہیں۔