اسلام آباد ہائی کورٹ نے جواب داخل نہ کرانے پر سول ایوی ایشن اتھارٹی پر 25 ہزار روپے جرمانہ عائد کر دیا۔ 

تفصیلات کے مطابق سول ایوی ایشن اتھارٹی کے ریٹائرڈ ملازمین کی پینشن میں اضافہ نہ کرنے کے خلاف اسلام آباد ہائی کورٹ میں درخواست پر سماعت ہوئی۔

عدالت نے جواب داخل نہ کرانے پر سول ایوی ایشن اتھارٹی پر 25 ہزار روپے جرمانہ عائد کردیا۔

جسٹس بابر ستار نے پٹیشنر لیاقت علی ملک سمیت دیگر ریٹائرڈ ملازمین کی درخواستوں پر سماعت کی۔ پٹیشنرز کی جانب سے آصف تمبولی ایڈووکیٹ عدالت میں پیش ہوئے۔

درخواست میں مؤقف اپنایا گیا کہ پینشن بڑھانے میں تاخیر یا انکار آئین کے آرٹیکل 25 کی خلاف ورزی ہے۔ پینشن میں اضافہ کے لیے سول ایوی ایشن اتھارٹی کے ریٹائرڈ ملازمین سے یکساں سلوک نہیں کیا گیا۔

وکیل درخواست گزار نے مؤقف اپنایا کہ تیس جون 2014 سے پہلے ریٹائر ہونے والے ملازمین کی پینشن میں اضافہ، باقیوں کو محروم رکھا گیا۔ محکمے کو داد رسی کے لیے درخواست دی جس پر کوئی کارروائی نہیں کی گئی۔

درخواست میں کہا گیا کہ ادارے کے ریٹائرڈ ملازمین کے ساتھ امتیازی سلوک نہیں کیا جا سکتا اور استدعا کی گئی کہ عدالت سول ایوی ایشن اتھارٹی پینشن ریگولیشن 2014 کے تحت پینشن میں اضافہ کے احکامات جاری کرے۔