صدر مملکت ڈ اکٹرعارف علوی کا کہنا ہے کہ اسکاؤٹس کسی بھی معاشرے کا سب سے مضبوط اور باخبر طبقہ ہوتے ہیں اور قومی شعور کی بیداری میں ان کا اہم کردار ہوتا ہے ۔

تفصیلات کے مطابق صدرمملکت نے آ ج اسلام آباد میں چیف اسکاؤٹ کی حیثیت سے حلف اٹھایا ، حلف برداری کے بعد خطاب کرتے ہوئے ان کا کہنا تھا کہ اسکاوٹس کو خصوصاً دیہی علاقوں میں حکومت کے اقدامات میں تعاون کرنا چاہیے۔

صدر نے معاشرے میں اسکاؤٹس کی اہمیت پر روشنی ڈالتے ہوئے کہاکہ اسکاوٗٹس وہ طبقہ ہے جو معاشرے کو تعلیم، صحت و صفائی، کرپشن اور جعلی خبروں کی روک تھام کے لیے تیار کرسکتا ہے۔

ان کا کہنا تھا کہ موجودہ حکومت تعلیمی شعبے میں اصلاحات لانے اور سکول نہ آنے والے بچوں کو تعلیمی اداروں میں لانے کےلئےکوشاں ہیں، ایک تربیت یافتہ اسکاؤٹ اس معاملے میں بے پناہ کام کرسکتا ہے۔

عالمی حدت کے مسئلے کےبارے میں صدر نے کہا کہ اسکاوٹس کو اس مسئلے سے نمٹنے کےلئے شجرکاری مہموں میں سرگرمی سے حصہ لینا چاہیے۔

ڈاکٹر عارف علوی نےکہا کہ اسکاوٹس کو ابتدائی طبی امداد کی بھی تربیت دی جانی چاہیے تاکہ وہ مشکل حالات میں معاشرے میں بھرپور کردار ادا کرسکیں۔

صدر نے اس بات پر افسوس کا اظہار کیا کہ بھارت کی جانب سے پاکستان کےلئے کشیدہ صورتحال اور مسائل پیدا کئے جارہے ہیں۔ ان کا کہنا تھا قوم نے غربت اور جہالت سمیت کثیر الجہتی چیلنجوں سے نمٹنے کےلئے خطے میں امن و استحکام کے حوالے سے پاکستان کے عزم کا اعادہ کیا ہے۔