احتساب عدالت لاہورنے وزیراعظم شہبازشریف سمیت دیگر کیخلاف آشیانہ اقبال ریفرنس کی سماعت 29 اکتوبر تک ملتوی کردی۔ 

احتساب عدالت نے ملزم ندیم ضیاء اور کامران کیانی کی عبوری ضمانت میں توسیع کرتے ہوئے  تفتیشی افسر کو 2 ملزموں کے شامل تفتیش ہونے سے متعلق رپورٹ پیش کرنے کا حکم دیا۔

احتساب عدالت کے جج ساجد علی اعوان نے سماعت کی جبکہ شہباز شریف کے پلیڈر انوار حسین ایڈووکیٹ نے عدالت میں حاضری مکمل کرائی۔

ملزم ندیم ضیا، کامران کیانی عبوری ضمانت پر اورملزم احد خان چیمہ سمیت دیگر ملزم بھی عدالت پیش ہوئے۔

وزیراعظم شہباز شریف کے وکیل امجد پرویز ایڈووکیٹ نے اشتہاری ملزمان کے پیش ہونے پر ٹرائل نہ روکنے کی استدعا کی۔

امجد پرویز ایڈووکیٹ نے مؤقف پیش کیا کہ کئی سال سے انصاف کے منتظر ملزمان کا ٹرائل جلد مکمل کیا جائے، دو نئے ملزمان ندیم ضیاء پیرزادہ اور کامران کیانی  شامل تفتیش ہو چکے ہیں۔ 2 ملزمان کی تفتیش جاری ہے کیس کا ٹرائل ان ملزمان کی وجہ سے نہ روکا جائے۔

وکیل امجد پرویز نے دلائل دیے کہ ہو سکتا ہے نیب ندیم ضیاء اور کامران کیانی کو بے گناہ قرار دیدے۔ نیب 2 ملزمان کی حد تک الگ ریفرنس بھی دائر کر سکتا ہے۔ ریفرنس میں کافی گواہان کے بیانات قلم بند ہو چکے ہیں دو ملزمان کی وجہ سے ٹرائل کو نہ روکا جائے۔

شریک ملزم بلال قدوائی نے بریت کی درخواست دائر کر رکھی ہے۔ بلال قدوائی کے وکیل بیرسٹر حیدر رسول نے بھی ٹرائل جلد مکمل کرنے کی استدعا کر دی۔