ناظم جوکھیو قتل کیس میں عدالت نے آئندہ سماعت پرنادرا حکام سے رپورٹ طلب کرلی۔

ایڈیشنل ڈسٹرکٹ اینڈ سیشن جج ملیرکی عدالت میں ناظم جوکھیو قتل سے متعلق کیس کی سماعت ہوئی۔ جیل حکام کی جانب سے رکن سندھ اسمبلی جام اویس کو آج بھی عدالت میں پیش نہیں کیا گیا۔

ناظم جوکھیو کے قانونی ورثاء سے متعلق ایس ایچ او میمن گوٹھ اور مختیار کار گڈاپ کی جانب سے عدالت میں رپورٹ میں پیش کی گئی تاہم نادرا کی جانب سے ناظم جوکھیو کے قانونی ورثاء سے متعلق رپورٹ پیش نہیں کی جا سکی جس پرعدالت نے آئندہ سماعت پر نادرا سے رپورٹ طلب کرلی۔

ناظم جوکھیو کی اہلیہ اور والدہ اور ملزمان کی جانب سے صلح کی درخواست جمع کرائی گئی تھی جس میں ناظم جوکھیو کے قانونی ورثا کا مؤقف تھا کہ ہمارے درمیان صلح ہوچکی ہے۔

اہلخانہ ناظم جوکھیو نے درخواست میں کہا کہ جام اویس سمیت 6 ملزمان کو کیس سے بری کرنے پر کوئی اعتراض نہیں ہے۔

عدالت نے کیس مزید سماعت 22 اکتوبر تک ملتوی کردی۔

کیس میں پیپلزپارٹی کے رکن قومی اسمبلی جام عبدالکریم کا نام عدم شواہد کی بنا پر نکالا جا چکا ہے۔

دوسری جانب سٹی کورٹ میں کراچی کی کم سن لڑکی کے مبینہ اغوا سے متعلق کیس کی سماعت میں ملزم ظہیر اور شبیر سمیت چاروں ملزمان عدالت میں پیش ہوئے۔

پولیس ملزمہ نور بی بی سمیت چھ مفرور ملزمان کو تاحال گرفتار کرنے میں ناکام ہے اور عدالت کو بتایا کہ مفرور نور بی بی سمیت دیگر کی گرفتاری کے لیے کوشش جاری ہے۔

عدالت نے مفرور ملزمان کے ایک بار پھر ناقابل ضمانت وارنٹ گرفتاری جاری کرتے ہوئے مزید سماعت 29 اکتوبر تک ملتوی کر دی۔