آسٹریلیا میں ٹی ٹوئنٹی ورلڈ کپ سے قبل وارم اپ میچز میں آسٹریلیا کے خلاف بھارتی ٹیم کے اہم کھلاڑی رشبھ پنت زخمی ہو گئے ہیں۔

 کا آٹھواں ایڈیشن شروع ہوگیا ہے۔ ٹورنامنٹ میں اس وقت وارم اپ اور کوالیفائر میچ کھیلے جارہے ہیں۔

تفصیلات کے مطابق ٹی ٹوئنٹی کے 8 ویں عالمی ایونٹ میں وارم اپ میچز کے بعد اگلے ہفتے سے سپر 12 میچز کھیلے جائیں گے۔

سپر 12 راؤنڈ میں بھارتی کرکٹ ٹیم اپنا پہلا میچ 23 اکتوبر کو میلبورن کرکٹ گراؤنڈ میں پاکستان کے خلاف کھیلنا ہے۔

تاہم اس میچ سے قبل ہی بھارتی ٹیم کو زبردست جھٹکا لگا ہے اور ٹیم کے وکٹ کیپر بلے باز رشبھ پنت کو شدید چوٹ لگی ہے۔

سوشل میڈیا پر کچھ تصاویر وائرل ہورہی ہیں جن میں وکٹ کیپر رشبھ پنت ٹانگ پر پٹی باندھے بیٹھے نظر آرہے ہیں۔ پنت آسٹریلیا کے خلاف وارم اپ میچ میں بلے بازی کیلئے بھی نہیں آئے تھے۔

وائرل تصاویر منظر عام پر آنے کے بعد پنت کے زخمی ہونے کی خبریں سوشل میڈیا پر تیزی سے وائرل ہورہی ہیں، ان تصاویر میں وہ میدان کے باہر بیٹھ کر ساتھی کھلاڑیوں سے بات کرتے نظر آرہے ہیں۔

تاہم بورڈ آف کنٹرول فار کرکٹ ان انڈیا اور رشبھ پنت نے ابھی تک انجری کے حوالے سے کوئی آفیشل بیان نہیں دیا ہے۔

واضح رہے کہ بھارت نے ٹی 20 ورلڈ کپ 2022 کیلئے پنت اور کارتک کی شکل میں دو وکٹ کیپر بلے بازوں کو اپنی ٹیم میں شامل کیا ہے۔

تاہم اب یہ دیکھنا دلچسپ ہوگا کہ اتوار کو ہائی وولٹیج میچ میں پاکستان کے خلاف رشبھ پنت اور دنیش کارتک میں سے کس کو شامل کیا جاتا ہے۔

آسٹریلیا کے خلاف وارم اپ میچ میں دنیش کارتک نے 14 گیندوں میں ایک چوکے اور ایک چھکے کی مدد سے 20 رنز بنائے اور بھارتی ٹیم نے اس میچ میں 6 رنز سے کامیابی حاصل کی تھی۔

واضح رہے کہ دنیش کارتک نے جنوبی افریقہ کے خلاف حالیہ اختتام پذیر سیریز میں بھی شاندار بیاٹنگ کی تھی.