شہلا رضا کا کہنا ہے کہ اغوا کے بعد اجتماعی ذیادتی کا نشانہ بننے والی نوعمر لڑکی سیلاب متاثرہ نہیں ہے۔ 

صوبائی وزیر ترقئ نسواں سندھ سیدہ شہلا رضا نے جناح اسپتال کا دورہ کیا جہاں انھوں نےگزشتہ روز کلفٹن کے علاقے سے اغوا کے بعد اجتماعی ذیادتی کا نشانہ بننے والی نو عمر لڑکی کی عیادت کی۔

اس موقع پر صوبائی وزیر نے نوعمر لڑکی کے ساتھ پیش آنے والے اس افسوسناک واقعے پر دکھ کا اظہار کیا اور ڈاکٹرز کو بچی کو تمام تر طبی سہولیات فراہم کرنے کی ہدایت کی۔

انھوں نے متاثرہ بچی کی والدہ کو ہر ممکن قانونی مدد فراہم کرنے اور مجرموں کوجلد ازجلد کیفرکردارتک پہنچانے کی یقین دہانی کرائی۔

صوبائی وزیرشہلا رضا نے واضح کیا کہ بچی کے والد انتقال کرچکے ہیں اور اسکی والدہ غربت سے تنگ آکر پانچ بچوں کے ہمراہ کراچی آئی ہے۔ موجودہ دور میں بچے اور بچیوں کے ساتھ ذیادتی کے بڑھتے ہوئے واقعات مجرموں کو سخت ترین سزائے دینے کا تقاضا کررہے ہیں۔

انھوں نے مذید کہا کہ پولیس کو چاہیے کہ ذیادتی کے واقعات کے مقدمات کے اندراج میں سخت قانونی دفعات شامل کرے اورعدالتوں کو بھی چاہئے کہ جرم ثابت ہوجانے پرمجرمان کو سخت سزائیں دیں۔

شہلا رضا نے والدین کو پیغام دیا کہ وہ بھی اپنے بچوں کو ایسے درندوں کے رحم و کرم پر نہ چھوڑیں ان کا خیال رکھیں۔