پاکستان تحریک انصاف کے سینئر رہنما علی حیدر زیدی نے کہا ہے کہ ہمیں شک ہے کہ سندھ پولیس عنقریب گرفتاریاں کرنے والی ہے۔

تفصیلات کے مطابق پی ٹی آئی رہنما علی زیدی نے پریس کانفرنس کرتے ہوئے کہا کہ حکومت کو عمران فوبیا کی بیماری ہے۔

علی زیدی نے کہا کہ صحافیوں کے قاتل سندھ میں گھوم رہے ہیں، پیپلز پارٹی بھٹو کے ساتھ ہی مر گئی تھی، بے نظیر کے بعد سندھ میں ڈاکوؤں کا راج ہے۔

ان کا کہنا تھا کہ ارشد شریف کی ماں میں بہت حوصلہ ہے۔

انہوں نے مزید کہا کہ ہمیں شک ہے کہ سندھ پولیس گرفتاریاں کرنے والی ہے۔

اس کے علاوہ سابق گورنر سندھ عمران اسمٰعیل نے بھی پریس کانفرنس میں کہا کہ عمران خان کو لوگ صادق اور امین جانتے ہیں۔

عمران اسمٰعیل نے کہا کہ خان صاحب نے ہمیں لاہور بلایا ہے۔

انہوں نے کہا کہ لانگ مارچ سے سندھ حکومت کو تکلیف ہو رہی ہے جبکہ عمران خان کا آصف زرداری سے مقابلہ عمران خان کی توہین ہے۔

ان کا کہنا تھا کہ لانگ مارچ کو روکنے کے لیے 45 کروڑ روپے مختص کیے گئے ہیں جبکہ ہم نے کبھی بھی قانون توڑنے کی بات نہیں کی ہے۔

 عمران اسمٰعیل نے کہا کہ ہمارے ساتھ خواتین ہوتی ہیں اس لیے ہم اسلحے سے لیس نہیں ہوتے ہیں۔

انہوں نے کہا کہ عمران خان کو لوگ صادق اور امین جانتے ہیں۔

ان کا کہنا تھا کہ شرجیل میمن نے کہا کہ ارشد شریف کے قتل کے تانے بانے بنی گالے سے ملتے ہیں جبکہ ارشد شریف کو نوکری سے حکومت نے نکلوایا۔

ان کا یہ بھی کہنا تھا کہ بلاول بھٹو جس تقریب میں بیٹھا تھا وہاں اداروں کے لئے غداری کے نعرے لگائے جارہے تھے۔

سابق گورنر سندھ عمران اسمٰعیل نے مزید کہا کہ رانا ثناء اللہ بھی عمران خان سے معافی مانگے گا۔