کور کمانڈر پشاور لیفٹیننٹ جنرل حسن اظہر حیات نے میر علی، شمالی وزیرستان ضلع اور باڑہ، خیبر کا دورہ کیا۔

پاک فوج کے شعبہ تعلقات عامہ (آئی ایس پی آر) کے مطابق کور کمانڈر نے اپنے دورے کے دوران آرمی پبلک اسکول کا افتتاح کیا اور بوائز ہاسٹل اور پاکستان سویٹ ہوم کا بھی دورہ کیا۔

آئی ایس پی آر نے بتایا کہ پاکستان سویٹ ہوم 2017 میں قائم کیا گیا تھا اور اس وقت میر علی اور میران شاہ کے 96 یتیم بچے بغیر کسی خرچ کے اس سہولت سے فائدہ اٹھا رہے ہیں۔

آئی ایس پی آر نے بتایا کہ آرمی پبلک سکول کا قیام مقامی لوگوں کا عوامی مطالبہ تھا جس میں پہلی سے آٹھویں جماعت تک کے طلبہ تعلیم حاصل کریں گے، اسکول میں ایک وقت میں 525 طلبہ کو داخل کرنے کی گنجائش ہے جبکہ بوائز ہاسٹل ملحقہ علاقوں کے 123 طلباء کو مفت رہائش فراہم کر رہا ہے۔

آئی ایس پی آر کا کہنا تھا کہ کور کمانڈر اسکاؤٹس ٹریننگ اکیڈمی (ساؤتھ) میر علی میں منعقدہ بیسک ملٹری ٹریننگ کورس کی پاسنگ آؤٹ پریڈ کے مہمان خصوصی تھے جہاں سے 31ویں ایڈیشن کے کل 1164 ریکروٹس تربیت کی کامیاب تکمیل کے بعد پاس آؤٹ ہوئے۔

آئی ایس پی آر کے مطابق اپنے دورہ باڑہ کے دوران کور کمانڈر نے تیراہ، باغ میدان، راجگال، لنڈی کوتل، باڑہ، مولا گوری اور جمرود سے تعلق رکھنے والے قبائلی عمائدین کے گرینڈ جرگہ میں شرکت کی اور امن کے قیام میں قبائلیوں کی قربانیوں کو سراہتے ہوئے یقین دلایا کہ پاک فوج مقامی لوگوں کی ہر ممکن مدد کرے گی۔

آئی ایس پی آر نے بتایا کہ ملاکس اور مشران نے علاقے میں امن کی بحالی اور NMDs میں سماجی و اقتصادی ترقی کے لیے جاری کوششوں پر پاک فوج کا شکریہ ادا کیا۔ انہوں نے کور کمانڈر کو سیکیورٹی فورسز کے لیے اپنی غیر متزلزل حمایت کا بھی یقین دلایا۔