سابق بھارتی کھلاڑی اور ہیڈ کوچ روی شاستری نے شاہین آفریدی سے متعلق بڑی پیش گوئی کردی ہے۔

سابق بھارتی کھلاڑی روی شاستری کا کہنا تھا کہ پاکستان ٹیم جلد ٹی ٹوئنٹی ورلڈ کپ کے سپر 12 مرحلے سے باہر ہونے جارہی ہے۔

انجری کے بعد ٹی ٹوئنٹی ورلڈ کپ میں مایوس کن کارکردگی کے ساتھ واپسی کرنے والے شاہین آفریدی سے متعلق روی شاستری نے اپنے خیالات کا اظہار بھی کیا۔

ٹی ٹوئنٹی ورلڈ کپ میں شاہین آفریدی کی کارکردگی سے متعلق سوال پر انہوں نے کہا کہ پاکستانی تھنک ٹینک نے اسٹار پیسر کو فوراً ہی ایکشن میں دھکیل دیا ہے۔

انہوں نے پیش گوئی کی کہ شاہین آفریدی ٹی ٹوئنٹی ورلڈ کپ کے بعد مسابقتی کرکٹ سے وقفہ لیں گے۔

انہوں نے کہا کہ ’ایک بات واضح ہے کہ وہ لوگ شاہین کو تکلیف دے رہے ہیں، تکلیف کا مطلب جسمانی طور پر تکلیف دینا ہے جب کہ مجھے نہیں لگتا کہ وہ مکمل طور پر فٹ ہیں‘۔

ان کا کہنا تھا کہ ’شاہین کو تھوڑا جلدی واپس بلوا لیا گیا ہے جب کہ شاہین سے انہیں توقعات بھی بہت زیادہ ہیں۔ یہ ورلڈ کپ ہے تو ان پر دباؤ ہوگا، وہ خود بھی کھیلنا چاہتے ہیں جب کہ ان کا ملک اور سلیکٹرز بھی چاہتے ہیں کہ وہ کھیلیں۔

روی شاستری کہتے ہیں کہ وہ آہستہ آہستہ ہی واپس اپنی فارم میں آئیں گے، میں انہیں ورلڈ کپ کے بعد بڑا وقفہ لیتے ہوئے دیکھ رہا ہوں۔

واضح رہے کہ گھنٹے کی انجری کے باعث شاہین آفریدی ایشیاکپ سے باہر ہوگئے تھے جب کہ انہوں نے کرکٹ میں واپسی کے بعد اب تک تین میچز کھیلے ہیں جس میں ان کی کارکردگی مایوس کن رہی ہے۔

بھارت اور زمبابوے کے خلاف شاہین نے کوئی وکٹ حاصل نہیں کی تھی جب کہ نیدر لینڈز کے خلاف انہوں نے 4 اوورز میں 19 رنز دے کر صرف ایک وکٹ حاصل کی ہے۔