اسلام آباد میں منعقدہ خصوصی تقریب میں وزیردفاع خواجہ محمد آصف بحیثیت مہمان خصوصی، وزیر مملکت امور خارجہ حنا ربانی کھراور دیگر شخصیات شریک تھیں۔ 

تفصیلات کے مطابق اسلام آباد میں ترکیہ کے ننانویں یوم جمہوریہ کے سلسلے میں خصوصی تقریب کا انعقاد کیا گیا جس میں وزیر دفاع خواجہ محمد آصف نے بحیثیت مہمان خصوصی، وزیر مملکت امور خارجہ حنا ربانی کھر، سابق سیکرٹری خارجہ سہیل محمود سمیت متعدد سیاسی، کاروباری و سفارتی شخصیات نے شرکت کی۔

تقریب کا آغاز دونوں ممالک کے قومی ترانوں سے ہوا جو کہ ترکی سے خصوصی طور پر آئے فنکاروں نے اپنے سازوں پر بجائے۔ تقریب میں ترکیہ جنگ آزادی اور جمہوریہ کے قیام میں غازی مصطفی کمال اتاترک، دیگر شہدا وغازیوں کو زبردست خراج عقیدت پیش کیا گیا۔

ترک سفیرمہمت پاجاچی نے تقریب سے خطاب میں کہا کہ اکتوبر 29 کو ننانوے برس پہلے ترک ریاست قائم کی گئی، غازی کمال اتا ترک اور دیگر شہداء کو بھی خراج عقیدت پیش کرتے ہیں۔ ننانوے برس پہلے بہت سے قربانیوں کے بعد ترکیہ ریاست حاصل کی۔

انھوں نے کہا کہ ہم نے ترکیہ کو ایک مثالی جمہوریت اور اعلی معیشت بنایا۔ ترکیہ کی آزادی صدیوں سے محکوم عوام کی جدوجہد کا نتیجہ تھی۔ پاکستان کی ترکیہ کے لیے محبت لازوال اور ہمارا فخر ہے۔

مہمت پاجاچی نے ترکیہ صدر رجب طیب اردوان کا پیغام پڑھ کرسنایا۔

وزیردفاع خواجہ محمد آصف نے کہا کہ پاکستان ترکیہ و دیگر ممالک کے ساتھ مل کر روس اور یوکرین کے درمیان ثالثی اور جنگ بندی کے لیے ترکیہ کے ساتھ کردار ادا کرنے کو تیارہیں۔

خواجہ محمد آصف نے تقریب سے خطاب کرتے ہوئے کہاہے کہ ترکیہ کی جنگ آزادی اکیسویں صدی کا اہم ترین معرکہ ہے، ترکیہ کی جنگ آزادی پاکستان اور ترکیہ دونوں ممالک کے لیے قابل فخر ہے۔ترکیہ کا شام اور ملحقہ خطے میں کلیدی کردار ہے۔

وزیردفاع کا کہنا ہے کہ ترکیہ یوکرائن روس تنازعہ کے خاتمے کے لیے کلیدی کردار ادا کر رہا ہے۔ ہم ترکیہ و دیگر ممالک کے درمیان ثالثی اور جنگ بندی کے لیے ترکیہ کے ساتھ کردار ادا کرنے کو تیار ہیں۔

تقریب میں خصوصی طور پر شریک ترکیہ فنکاروں نے اپنا فن موسیقی پیش کیا جسے شرکاء نے بےحد سراہا۔