سردار تنویر الیاس خان نے کہا ہے کہ عوام انتخابات کی بھرپور تیاری کریں۔

تفصیلات کے مطابق وزیراعظم آزاد کشمیر سردار تنویر الیاس خان نے اپنے ایک بیان میں کہا کہ آزاد کشمیر میں بلدیاتی انتخابات کسی صورت التوا کا شکار نہیں ہونگے۔

انہوں نے کہا کہ عمران خان کے ویژن، پی ٹی آئی کے انتخابی منشور اور عوام سے کیے گئے بڑے وعدے کو عملی جامہ پہنانے اور سپریم کورٹ کی ہدایات کے مطابق بلدیاتی انتخابات مقررہ وقت پر ہونگے۔

سردار تنویر الیاس خان نے کہا کہ الیکشن کمیشن کو ان کی ضرورت  کے مطابق بروقت انتخابات کے انعقاد کیلئے وسائل کردئیے گئے ہیں جبکہ انتخابات کے لیے سکیورٹی فورسز کا کوئی ایشو نہیں، وفاقی حکومت اور صوبوں سے رابطے میں ہیں۔

انہوں نے کہا کہ عوام افواہوں پر کان نہ دھریں اور انتخابات کی بھرپور تیاری کریں، عوام سے وعدہ ہے کہ آپ کے حقوق پر کوئی کمپرومائز نہیں کرونگا اور آپکا دیرینہ خواب کسی صورت ٹوٹنے نہیں دونگا۔

ان کا کہنا تھا کہ 31 سال بعد بلدیاتی انتخابات کا انعقاد پی ٹی آئی کی حکومت کا اعزاز ہے۔

وزیراعظم آزاد کشمیر سردار تنویر الیاس خان نے مزید کہا کہ اگر کسی وجہ سے انتخابات کے لیے وفاق کی جانب سے سکیورٹی فورسز کی فراہمی ممکن نہیں ہوتی تو حکومت آزادکشمیر پنجاب، کے پی کے، گلگت بلتستان سے سکیورٹی فورسز اور پاک فوج سے بھی سکیورٹی کیلئے د رخواست کردی ہے۔