مسلم لیگ (ن ) کے صدر اور اپوزیشن لیڈر شہباز شریف نےکہا ہے کہ مہنگائی میں تیزی سے اضافہ نااہلی کی داستان  اور معاشی پالیسیوں کی ناکامی کی دلیل ہے ۔

تفصیلات کے مطابق پاکستان مسلم لیگ (ن) کے صدر اور قائد حزب اختلاف شہبازشریف نے مہنگائی میں اضافہ کی مذمت کرتے ہوئے کہا کہ مہنگائی کا سونامی پاکستان کی معیشت کھاگیا، غریب اور ان کے خواب دفن ہوکر رہ گئے ہیں۔

پاکستان مسلم لیگ (ن) کے صدر نے کہا کہ نوازشریف نے مہنگائی کے جن کو بوتل میں بند کیا تھا،موجودہ حکومت نے اسے آزادکرکے آدم خوردیو میں بدل دیا، نالائق، نااہل اورکرپٹ ٹولے کا 11000ارب کا قرض اژدہا بن کر معیشت اور عوام کو نگل رہا ہے۔

قائد حزب اختلاف شہبازشریف نے  یہ بھی کہا کہ مہنگائی کا سونامی پاکستان کی معیشت کو کھاگیا ہے، وزیراعظم عمران خان کے دور حکومت میں چند مافیا مالی فائدے اٹھا رہے ہیں۔

پاکستان مسلم لیگ (ن) کے صدر کا کہنا تھا کہ حکمران زرعی ملک کو تباہ کرنے کی پالیسی پر عمل پیرا ہیں شہروں سے زیادہ دیہی علاقوں کے عوام مہنگائی سے پریشان ہیں۔

عمران خان اور نیب گٹھ جوڑ کی وجہ سے میرے اثاثے منجمد کیے گئے، شہباز شریف

شہبازشریف کایہ بھی کہنا  تھا کہ14 اعشاریہ 6 فیصد کے افراط زر نے خوفزدہ کردیا اور اب  مہنگائی میں اضافے سے مزید 18فیصد پاکستانی غربت کی لکیر سے نیچے چلے گئے ہیں، یہ پریشان کن بات ہے۔

قائد حزب اختلاف شہبازشریف نے  کہا کہ حکمران ٹولہ نہ صرف ملی بھگت سے کرپشن کررہا ہے بلکہ سنگدلی کی حد تک نالائق اور بے حس بھی ہے جبکہ ظلم کی یہ انتہاءقہرالہی کو دعوت دینے کے مترادف ہے۔

بیان میں پاکستان مسلم لیگ (ن) کے صدر اور قائد حزب اختلاف شہبازشریف  نے مزید کہا کہ سفید پوش طبقات کا عزت سے رہنا ناممکن بنادیاگیا ہے جبکہ غریب، بیروزگار خود کشی کررہے ہیں۔