اپوزیشن رہنماؤں نے عمران خان کے کنٹینر پر فائرنگ کے واقعے پر شدید مذمت کی ہے۔

تفصیلات کے مطابق وزیرآباد میں لانگ مارچ کے آغاز پر پاکستان تحریک انصاف کے چیئرمین عمران خان کے کنٹینر کے قریب فائرنگ کا واقعہ پیش آیا جس میں وہ زخمی ہو گئے۔

مریم نواز کا ردعمل

سماجی رابطے کی ویب سائٹ ٹوئٹر پر مسلم لیگ ن کی نائب صدر مریم نواز نے کہا کہ عمران خان پر فائرنگ کی مزمت کرتی ہوں اور ان سمیت تمام زخمیوں کی صحت کے لیے اللّہ تعالی سے دعاگو ہوں۔

Advertisement

عمران خان پر فائرنگ کی مزمت کرتی ہوں اور ان سمیت تمام زخمیوں کی صحت کے لیے اللّہ تعالی سے دعاگو ہوں۔

— Maryam Nawaz Sharif (@MaryamNSharif) November 3, 2022

بلاول بھٹو کی فائرنگ پر شدید مذمت

سماجی رابطے کی ویب سائٹ ٹوئٹر پر ٹوئٹ کرتے ہوئے وزیر خارجہ بلاول بھٹو نے کہا کہ پی ٹی آئی چیئرمین عمران خان پر حملے کی شدید مذمت کرتے ہیں، ان کی جلد صحت یابی کے لیے دعا گو ہیں۔

Advertisement

Strongly condemn the attack on @ImranKhanPTI. Praying for his swift recovery.

— BilawalBhuttoZardari (@BBhuttoZardari) November 3, 2022

مولانا فضل الرحمان کا واقعے پر اظہار افسوس

جے یو آئی رہنما مولانا فضل الرحمان نے واقعے پر مذمت کرتے ہوئے کہا کہ پی ٹی آئی لانگ مارچ پر فائرنگ افسوسناک ہے، بھرپور مذمت کرتے ہیں۔

ان کا کہنا تھا کہ سیکیورٹی کے حوالے سے صوبائی حکومت کی کارکردگی سوالیہ نشان ہے، سیاست میں تشدد کی مذمت کرتے ہیں۔

انہوں نے مزید کہا کہ دعا ہے کہ اللہ کریم زخمیوں کو جلد صحتیاب کرے۔

حمزہ شہباز کی واقعہ پر مذمت

سماجی رابطے کی ویب سائٹ ٹوئٹر پر اپنے ایک پیغام میں اپوزیشن لیڈر پنجاب حمزہ شہباز نے کہا کہ عمران خان کے کنٹینر پر فائرنگ واقعے کی شدید مذمت کرتا ہوں۔

ان کا کہنا تھا کہ اللہ تعالی سب کو اپنی حفظ و امان میں رکھے، زخمی افراد کی جلد صحتیابی کے لئے دعا کرتا ہوں۔

حمزہ شہباز نے مزید کہا کہ پنجاب حکومت لانگ مارچ کے سیکیورٹی انتظامات کے حوالے سے آگاہ کرے۔

مریم اورنگزیب کا واقعے پر ردعمل

مریم اورنگزیب نے اپنے ایک ٹوئٹ میں کہا کہ وزیراعظم شہباز شریف نے عمران خان اور دیگر کے زخمی ہونے کی اطلاع پر دورہ چین سے متعلق آج ہونے والی اپنی پریس کانفرنس موخر کر دی ہے۔

وزیراعظم شہباز شریف نے گوجرانولہ میں فائرنگ کے واقعے پر دورہ چین سے متعلق آج ہونے والی اپنی پریس کانفرنس موخر کر دی ہے۔

— Marriyum Aurangzeb (@Marriyum_A) November 3, 2022

اے این پی سربراہ اسفندیار ولی خان کا ردعمل

اسفندیار ولی خان نے فائرنگ کی مذمت کرتے ہوئے کہا کہ ہم سیاست میں تشدد کے مخالف تھے، ہیں اور رہیں گے۔

ان کا کہنا تھا کہ واقعے میں ملوث ملزمان کو گرفتار کر کے سزا دی جائے اور ایک سابق وزیر اعظم کے احتجاج میں سیکیورٹی کی ناقص صورتحال کی تحقیقات کرائی جائیں۔

انہوں نے کہا کہ مرکزی و صوبائی حکومت ملزمان اور غفلت برتنے والوں کو سامنے لائے۔

اے این پی سربراہ نے مزید کہا کہ ہم فائرنگ کے واقعے میں زخمی افراد کی جلد صحتیابی کیلئے دعاگو ہیں۔

فیصل سبزواری کا واقعے پر اظہار افسوس

ایم کیو ایم کے رہنما فیصل سبزواری نے واقعے پر ردعمل دیتے ہوئے کہا کہ سابق وزیر اعظم عمران خان اور رفقا پر قاتلانہ حملہ انتہائی افسوسناک اور مذموم فعل ہے۔

ان کا کہنا تھا کہ خدا کا شکر ہے کہ عمران خان محفوظ رہے، پاکستان کسی صورت میں ایسے کسی سانحے کا متحمل نہیں ہو سکتا۔

انہوں نے مزید کہا کہ انتہائی ضروری ہے کہ وفاقی و صوبائی حکومتیں حملہ آور اور اس کے سہولت کاروں کو گرفتار کر کے سزا دیں۔

آصفہ بھٹو کی واقعے پر مذمت

سابق صدر آصف زرداری کی بیٹی آصفہ بھٹو نے اپنے ٹوئٹ میں کہا کہ عمران خان پر حملہ قابل مذمت ہے، ذمہ داران کو قرار واقعی سزا ملنا چاہیے۔

Attack is condemnable and perpetrators must be brought to justice.

Advertisement

— Aseefa B Zardari (@AseefaBZ) November 3, 2022