احتساب عدالت لاہور نے سابق وزیراعلیٰ پنجاب عثمان بزدار کی عبوری ضمانت کی درخواست کا تحریری حکم جاری کردیا ہے۔

تفصیلات کے مطابق احتساب عدالت میں عثمان بزدار پر مبینہ طور پر شراب لائسنس کے اجراء کے لئے اختیارات کے ناجائز استعمال کے الزام سے متعلق کیس کی سماعت ہوئی۔

عدالت میں عثمان بزادر کی جانب سے بیرسٹر مومن ملک ایڈووکیٹ نے اپنے دلائل دیے۔

احتساب عدالت نمبر 2 کے جج نسیم احمد وِرک نے عبوری ضمانت منظوری کا فیصلہ جاری کیا۔

عدالت نے اپنے تحریری حکم میں کہا ہے کہ نیب عثمان بزدار کے خلاف غیرقانونی اثاثے بنانے کے الزام میں چھان بین کررہا ہے، نیب نے یونیکورن پرسٹیج لمیٹڈ کے مالکان، انتظامیہ اور دیگر کے خلاف انکوائری شروع کی۔

عدالت نے کہا کہ عثمان بزدار کو یونیکورن پرسٹیج لمیٹڈ کو لائسنس جاری کرنے سے متعلق بیان ریکارڈ کروانے کیلئے طلب کیا گیا ہے۔

احتساب عدالت نے اپنے تحریری حکم میں کہا کہ عثمان بزدار کو ایڈیشنل ڈائریکٹر نیب کاشف مسرورکے روبرو ٹھوکر نیاز بیگ پیش ہونے کا نوٹس بھجوایا گیا ہے اور حکم دیا گیا ہے کہ عثمان بزدار نیب کے روبرو شامل تفتیش ہوں۔

تحریری حکم میں مزید کہا گیا کہ عثمان بزدار عبوری ضمانت کیلئے لاکھ روپے کے ضمانتی مچلکے جمع کروائیں۔

لاہور کی احتساب عدالت نے نیب سے معاملے پر 22 نومبر کو جواب بھی طلب کر لیا ہے۔

واضح رہے کہ عثمان بزدار پر شراب کے لائسنس کے اجراء کے لیے اختیارات کے ناجائز استعمال کا الزام ہے۔

گزشتہ روز احتساب عدالت نے قومی احتساب بیورو (نیب) کو سابق وزیر اعلیٰ پنجاب عثمان بزدار کی گرفتاری سے روک دیا تھا۔

احتساب عدالت