امیر جماعت اسلامی سراج الحق نے کہا ہے کہ تبدیلی کا آغاز وزیراعظم اور صدر کو اپنی ذات سے کرنا چاہیے۔

تفصیلات کے مطابق سماجی رابطے کی ویب سائٹ ٹویٹر پر اپنے ایک پیغام میں امیر جماعت اسلامی سراج الحق نے کہا کہ حکمران 18 ماہ میں قوم کو اپنے کسی ایک فیصلے سے بھی مطمئن نہیں کرسکے۔

 اپنے بیان میں سراج الحق نے کہا کہ عوام جب اپنے حکمرانوں اور افسروں کی موج دیکھتے ہیں تو ان کے زخم تازہ ہو جاتے ہیں۔

امیر جماعت اسلامی سراج الحق نے مزید کہا کہ جب حکمران عوام کے لیے ماڈل بنیں گے تو حقیقی تبدیلی اور انقلاب آئے گا۔

واضح رہے کہ اس سے قبل بھی  امیر جماعت اسلامی نے لاہور میں تقریب سے خطاب کرتے ہوئے کہا  تھا کہ وزیراعظم کے قوم سے وعدے ہوا میں تحلیل ہو گئے ہیں، موجودہ حکومت وینٹی لیٹر پر ہے مصنوعی سانس سے کب تک زندگی بچائی جائے گی ۔

امیر جماعت اسلامی نے کہا تھا کہ وزیراعظم نے اعلان کیا تھاکہپی ٹی آئی کے سونامی نے لوگوں سے روزگار ، چھت اور اب نوالہ چھیننا شروع کردیا ہے ۔

موجودہ حکومت بھی سابقہ حکمران پارٹیوں کی طرح اسٹیٹس کی محافظ ہے، سراج الحق  

اپنے بیان میں امیر جماعت اسلامی نے عمران خان پر تنقید کرتے ہوئے کہا تھا کہ 2020 ءخوشخبریوں اور خوشحالی کا سال ہے، پہلی خوشخبری آٹے کی قیمتوں میں دگنا اضافہ اور آٹے کا بحران ہے ،انھوں نے کہا کہ سچ تو یہ ہے کہ  2020 ءخوشخبریوں کا نہیں روٹھوں کو منانے اور غریب عوام کے امتحان کا سال ہے ۔

 امیر جماعت اسلامی کا یہ بھی کہنا تھا کہ مختلف الخیال لوگ ذاتی مفادات کے لیے جمع ہو گئے ہیں، منبر و محراب سے کرپشن ، مہنگائی اور ظلم کے خلاف آواز بلند کی جائے۔

امیر جماعت اسلامی سراج الحق  کا مزید کہنا تھا کہ علمائے کرام کا تحریک پاکستان میں ناقابل فراموش کردار ہے، علما کو پاکستان کی نظریاتی سرحدوں کی حفاظت کے لیے بھی موثر کردار ادا کرنا ہوگا ۔