عبدالقادر پٹیل نے کہا ہے کہ افغانستان اور پاکستان کے برادرانہ اور مضبوط تعلقات ہیں۔

تفصیلات کے مطابق وفاقی وزیر صحت عبدالقادر پٹیل سے افغانستان کے وزیر صحت ڈاکٹر قلندر عباد کی ملاقات ہوئی جس میں ہسپتالوں میں میڈیکل طبی آلات کی تنصیب اور درپیش چیلنجز کا بھی جائزہ لیا گیا۔

ملاقات میں دونوں وزراء نے صحت کے شعبے اور باہمی دلچسپی کے امور پر تبادلہ خیال کیا جبکہ صحت کے مختلف شعبوں پر ایک دوسرے سے تعاون پر اتفاق کیا۔

اس موقع پر افغانستان کے وزیر صحت نے کہا کہ افغانستان پاکستان کے تعلقات کو بڑی قدر کی نگاہ سے دیکھتے ہیں، صحت کے شعبے میں بہتری کیلئے بھر عملی اقدامات کر رہے ہیں۔

افغان وزیر صحت قلندر عناد نے کہا کہ افغانستان میں موجود تینوں ہسپتالوں کا 80 فیصد کام مکمل ہو چکا ہے ، افغانستان کو ادویات، آلات اور تربیت یافتہ طبی عملے کی شدید ضرورت ہے۔

اس حوالے سے بات کرتے ہوئے وفاقی وزیر صحت عبدالقادر پٹیل نے کہا کہ تینوں ہسپتالوں کو درپیش چیلنجز کو ترجیحی بنیادوں پر حل کریں گے ،پاکستان اس سلسلے میں بھر پور تعاون کرے گا ۔

ملاقات میں عبدالقادر پٹیل نے افغانستان اور پاکستان کو پولیو کے خاتمے کیلئے مل کر کام کرنے کی ضرورت پر زور دیا۔

عبدالقادر پٹیل نے کہا کہ حکومت پاکستان افغانستان کے ڈاکٹروں کی تربیت اور ڈاکٹروں و طبی عملے کی ضروریات پورا کرنے کیلئے عملی اقدامات کو یقینی بنائے گی۔

وفاقی وزیر صحت عبدالقادر پٹیل نے مزید کہا کہ افغانستان اور پاکستان کے برادرانہ اور مضبوط تعلقات ہیں، دونوں ممالک کے بارڈر پر آمد ورفت کا سلسلہ رہتا ہے ،دونوں ممالک کو مل کر ایک جامع اور مربوط حکمت عملی تشکیل دینا ہوگی۔

اس موقع پر افغانستان کے وزیر صحت ڈاکٹر قلندر عباد نے عبدالقادر پٹیل کو افغانستان کے دورے کی بھی دعوت دی۔