ایمازون کے بانی جیف بیزوس نے 214 ارب ڈالر کی اپنی دولت کا زیادہ حصہ عطیہ کرنے کا اعلان کیا ہے۔

غیر ملکی خبر رساں ادارے کے مطابق ایمازون کے بانی جیف بیزوس نے اعلان کیا ہے کہ وہ اپنی 214 ارب ڈالر کی دولت میں سے زیادہ حصہ عطیہ کردیں گے تاہم ساتھ میں انہوں نے یہ بھی کہا کہ ایسا کرنا مشکل ہے۔

انہوں نے کہا وہ اور ان کی دوست لارین سانچیز اس پر کام کررہے ہیں جب کہ انہوں نے کہا کہ وہ اپنی زندگی میں ہی یہ عطیہ کریں گے۔

ان کا کہنا تھا کہ ’مشکل سوال یہ ہے کہ ایسا کس طرح کیا جائے گا کیونکہ یہ آسان نہیں، ایمازون کو آگے بڑھانا آسان سفر نہیں تھا۔

جیف بیزوس کہتے ہیں کہ میں اس پر غور کررہا ہوں اور میرے خیال میں لارین بھی اس پر غٖور کررہی ہوں گی۔

گذشتہ ہفتے کو جیف بیزوس نے امریکی سنگر اور انسانی فلاح و بہبود کے لیے کام کرنے والی ڈولی پارٹن کو ایک کروڑ ڈالر عطیہ کیا تھا۔

اس حوالے ان کا کہنا تھا ڈولی پارٹن دل سے عطیہ کرتی ہیں جب کہ انہوں نے بچوں کی تعلیم کے حوالے سے کام کرنے پر ڈولی پارٹن کی تعریف بھی کی تھی۔

واضح رہے کہ ماضی میں بل گیٹس اور وارن بوفیٹ جیسی امیر شخصیات بھی اس طرح کے اعلانات کرچکی ہیں۔