ناشپاتی اینٹی آکسیڈینٹس اور صحت بخش فائبر سے بھرپور پھل ہے، اس کا روزانہ کا استعمال جان لیوا بیماریوں سے بچا سکتا ہے۔

یہ پھل مجموعی صحت کے لیے زبردست ہے جس کی وجہ اس میں فائبر، اہم غذائی اجزا اور منرلز کا موجود ہونا ہے اور صرف ایک ناشپاتی روزانہ کھانا ہی صحت کو بہت زیادہ فائدہ پہنچانے کے لیے کافی ہے۔

فوائد

کینسر کی روک تھام

ناشپاتی میں فائبر کی موجودگی آنتوں کے کینسر کا باعث بننے والے خلیات کی روک تھام کر کے اس مرض سے بچاتا ہے جبکہ روزانہ ایک ناشپاتی کھانا چالیس سال سے زائد عمر کی خواتین میں بریسٹ کینسر کا خطرہ 34 فیصد تک کم کردیتا ہے۔

بلڈ شوگر لیول کنٹرول کرے

ناشپاتی کافی میٹھی ہوتی ہے مگر کم گلیسمک انڈیکس اور زیادہ فائبر کی موجودگی کے باعث یہ پھل بلڈ شوگر لیول کو کنٹرول کرنے میں مدد دیتا ہے اور ذیابیطس سے بچاتا ہے۔

جسمانی مدافعتی نظام مضبوط بنائے

اس میں موجود اینٹی آکسائیڈنٹس جسمانی مدافعتی نظام کو مضبوط بنانے کا کام کرتے ہیں جس سے عام موسمی بیماریوں سے بچنے میں مدد ملتی ہے۔

جسمانی توانائی بڑھائے

ناشپاتی میں موجود گلوکوز فوری جسمانی توانائی فراہم کرنے والا جز ہے، یہ گلوکوز بہت تیزی سے جسم میں جذب ہوجاتا ہے اور جسمانی توانائی میں تبدیل ہوجاتا ہے۔

نظام ہاضمہ کے لیے بہترین

ایک درمیانی ناشپاتی روزانہ درکار فائبر کا 20 سے 25 فیصد حصہ فراہم کرتی ہے، یہ فائبر حل نہیں ہوتا تو آنتوں سے بہت آسانی سے گزر جاتا ہے، اسی طرح فائبر کے باعث یہ نظام ہاضمہ کو بہتر کرنے میں مدد دیتا ہے۔

بلڈ پریشر کو قابو میں رکھے

اس پھل میں موجود اینٹی آکسائیڈنٹس اور دیگر اجزا بلڈ پریشر کو کنٹرول کرنے میں مدد دیتے ہیں۔

بخار سے تحفظ

یہ پھل اپنی تاثیر میں ٹھنڈا ہوتا ہے اور یہ ٹھنڈک بخار کے علاج میں مددگار ثابت ہوسکتی ہے۔

گلے کی تکلیف کے لیے بہترین

اس پھل کا استعمال گرم موسم میں گلے کی خراش اور دیگر مسائل سے بچانے میں مدد دیتا ہے، روزانہ ایک ناشپاتی یا اس کے جوس کا ایک گلاس پینا گلے کی عام موسمی بیماریوں سے بچانے کے لیے کافی ثابت ہوسکتا ہے۔

جھریوں سے تحفظ

روزانہ ناشپاتی کھانا عمر بڑھنے سے چہرے پر نمودار ہونے والی جھریوں کو دور رکھنے میں مدد دے سکتا ہے، وٹامن سی، وٹامن کے اور کاپر سے بھرپور یہ پھل فری ریڈیکلز سے لڑتے ہیں اور جلد کے خلیات کو نقصان سے بچاتے ہیں، جس سے جلد کو ہموار رکھنے اور جھریوں سے بچنے میں مدد ملتی ہے۔