مسکراہٹ کتنی ہی دلفریب ہو اگر ہونٹ خوبصورت نہ ہوتو یہ چہرے کے حسن کو ماند کردیتے ہیں۔  ہونٹ کی جلد بہت حساس ہوتی ہے متوازن غذا کا نہ ہونا، پانی کی کمی، ذہنی تناؤ اور بدلتے موسموں کا سب سے زیادہ اثر ہونٹ کی جلد پر ہوتا ہے۔

موسم سرما میں خشک اور سرد ہوا کی بدولت ہونٹ اپنی دلکشی کھونے لگتے ہیں ان کے حسن کو برقرار رکھنے کے لئے جہاں ان عوامل کا خیال رکھنا لازم ہے وہی انہیں ہائیڈریٹ رکھنے کے لیے لپ بام یا لپ گلوزکا استعمال کرنا بھی اہمیت رکھتا ہے۔

بازار میں کئی طرح کے لپ گلوز دستیاب ہیں کیونکہ ان میں کئی طرح کی کیمیکل موجود ہوتے ہیں اس لئے انہیں ہر وقت نہیں لگایا جاسکتا ۔ یہی وجہ ہے کہ یہاں پر گھر میں موجود عام اشیاء سے صرف ایک منٹ میں 4 لپ گلوز تیار کرنے کی ترکیب سکھائی جارہی ہے جوکہ نہایت آسان ہیں۔

ان لپ گلوز بنانے کے لیے جو اجزاء درکار ہیں ان میں بنیادی جز ناریل کا تیل ہے اس کے علاوہ کوئی بھی استعمال شدہ لپ اسٹک، چاکلیٹ، گلیسرین اور فوڈ کلر شامل ہیں۔

ناریل کا تیل آپ کے ہونٹ کی جلد کو نمی بخش کر اور ہموارکرنے میں اہم کردار ادا کرتا ہے ساتھ ہی یہ ایک قدرتی چمک بھی فراہم کرتا ہے۔

 لپ گلوز

آدھا چمچ ناریل کا تیل لے کر اس میں کسی بھی رنگ کی لپ اسٹک کا چھوٹا سا ٹکڑا ڈال کر مائیکروویو میں چند سیکنڈ کے لیے رکھ دیں اب اسے کسی خالی لپ گلوز کی بوتل میں ڈال کر استعمال کریں۔

 چاکلیٹ لپ گلوز

اسے بنانے کے لیے آدھا چمچ ناریل کا تیل لے کر اس میں کسی بھی چاکلیٹ کا چھوٹا سا ٹکڑاشامل کر کے مائیکروویو میں چند سیکنڈ کے لیے رکھ دیں اسے کسی بھی بوتل میں رکھ کر ہونٹوں پر لگائیں یہ ہونٹ کو نرم بنانے کے ساتھ چاکلیٹ کا مزیدار ذائقہ بھی فراہم کرے گا۔

شائنی لپ گلوز

آدھا چمچ ناریل کے تیل میں چند قطرے گلیسرین کے شامل کریں پھر اسے مائیکروویو میں چند سیکنڈ کے لیے رکھ دیں، اب اسے بھی کسی لپ گلوز کی خالی بوتل میں ڈال کر استعمال کریں۔

فوڈکلرلپ گلوز

اس لپ گلوز کی تیاری کے لیے آدھا چمچ ناریل کے تیل میں ایک قطرہ سرخ  فوڈ کلر شامل کر کے مائیکروویو میں چند سیکنڈ کے لیے رکھ دیں، اب اسے بھی کسی باتل میں نکال لیں۔ لیجئے 4 بہترین لپ گلوز تیار ہیں۔