وزیر خارجہ بلاول بھٹو نے کہا کہ پاکستان امریکا کے ساتھ برابری کی بنیاد پر تعلقات چاہتا ہے۔

تفصیلات کے مطابق وفاقی دارالحکومت اسلام آباد میں پریس کانفرنس کرتے ہوئے وزیر خارجہ بلاول بھٹو زرداری نے کہا کہ تمام ممالک کے ساتھ مضبوط تعلقات سے ہم عوام اور ملکی بہتری کے لیے کام کر سکتے ہیں۔

بلاول بھٹو نے کہا کہ پاکستان اور امریکا کے مابین روابط میں کمی سے دونوں ممالک کے لیے مسائل پیدا ہوئے۔

 وزیر خارجہ نے یہ بھی کہا کہ پاکستان اور امریکا کے درمیان اچھے اور تاریخی تعلقات ہیں، ہم ہمسایہ ممالک سے اچھے تعلقات چاہتے ہیں۔

بلاول بھٹو کا کہنا تھا کہ امریکا مختلف شعبوں میں تعاون سے متعلق پاکستان کا دیرینہ شراکت دار ہے جبکہ پاکستان امریکا کے ساتھ برابری کی بنیاد پر تعلقات چاہتا ہے۔

ان کا یہ بھی کہنا تھا کہ ہمارا فوکس پاکستان کے مفاد کو آگے رکھنا ہے، میری امریکی سیکرٹری خارجہ  سے بھی اہم امور پر بات ہوئی ہے، پاکستان اور امریکا نے کئی مشترکہ اہداف حاصل کیے ہیں۔

وزیر خارجہ نے کہا کہ جب وزیرخارجہ  کا عہدہ سنبھالا تو پاکستان اور چین کے درمیان معاملات پر کام کیا، چینی ہم منصب سے بھی گفتگو ہوئی جبکہ دہشت گردی،معاشی ،سیاسی اور دیگر امور پر چینی  قیادت سے بات چیت ہوئی۔

بلاول بھٹو زرداری کا کہنا تھا کہ چین نے مشکل مالی حالات میں ہماری مدد کی، دونوں ممالک کے مابین سی پیک منصوبے سمیت تمام معاملات پر مثبت بات ہوئی۔

ان کا یہ بھی کہنا تھا کہ ہم بہت مشکل دور سے گزر کرآئے ہیں، خارجہ پالیسی سے  متعلق ہمیں چیلنجز کا سامنا تھا، اس میں بہتری کے لیے کام کررہے ہیں۔

وزیر خارجہ بلاول بھٹو زرداری کا مزید کہنا تھا کہ پچھلے 5 سے 6 ماہ کی خارجہ پالیسیوں کے باعث ملک کو فائدہ ہوا ہے، ہماری تمام تر ترجیحات پاکستان کا مفاد ہے، ہم کوشش کریں گے کہ پاکستان بھی ایف اے ٹی ایف کے نظام کا حصہ بنے۔