موسمیاتی تبدیلیوں سے متعلق پاکستان کی سفارتی کوششیں رنگ لے آئیں، عالمی برادری نے متاثرہ ترقی پذیر ملکوں کی امداد کا اعلان کر دیا۔

تفصیلات کے مطابق مصر کے شہر شرم الشیخ میں کاپ ٹوئنٹی سیون میں تاریخی معاہدہ طے پا گیا، اقوام متحدہ کے تحت کوپ 27 اجلاس میں ماحولیاتی نقصان کے ازالے کے لیے فنڈ قائم کرنے پر اتفاق ہو گیا۔

اس حوالے سے ترجمان دفتر خارجہ ممتاز زہراء بلوچ نے اپنے جاری کردہ بیان میں بتایا کہ ماحولیاتی تبدیلی پر اقوام متحدہ کے فریم ورک کنونشن کی 27ویں کانفرنس (کوپ 27) نے موسمیاتی تبدیلیوں کے خطرے سے دوچار ترقی پذیر ممالک کے لیے فنڈ کی منظوری دے دی۔

ممتاز زہراء بلوچ نے کہا کہ کوپ 27 فنڈ ترقی پزیر ممالک میں موسمیاتی تبدیلیوں سے ہونے والے نقصانات کے خطرے سے بچاو اور ازالہ کے لئے مختص ہو گا۔

ترجمان دفتر خارجہ نے کہا کہ فنڈ کا قیام پاکستان اور وزیر خارجہ بلاول بھٹو زرداری کی مسلسل کوششوں کا نتیجہ ہے، بلاول بھٹونے بطور چیئرمین گروپ 77 پلس چین اور کوپ 27میں ترقی پزیر ممالک کی مدد کے لیے فنڈ کے قیام کی خاطر انتھک جدوجہد کی۔

انکا کہنا ہے کہ بلاول بھٹو کی صدارت میں گروپ 77 پلس چین نے نیویارک میں ہونے والے اپنے اجلاس میں اس فنڈ کے قیام کی حمایت اور توثیق کی تھی۔

ترجمان ممتاز زہراء بلوچ نے مزید کہا کہ پاکستان اور تمام ترقی پذیر ممالک کے لیے کوپ 27 فنڈ کا قیام ایک بڑی کامیابی ہے۔

خیال رہے کہ کاپ27 کا سربراہی اجلاس شرم الشیخ میں 7 سے 8 نومبر کو منعقد ہوا تھا۔ کانفرنس اور مصر کے صدر کی خصوصی دعوت پر وزیر اعظم شہباز شریف بھی اس میں شریک ہوئے تھے، اجلاس میں 2 سو ملکوں کے نمائندوں نے شرکت کی۔