پاپوا نیوگنی میں دنیا کا ایک نایاب ترین گمشدہ پرندہ دریافت کیا گیا ہے۔

تفصیلات کے مطابق امریکی سائنسدانوں نے کبوتر سے مشابہت اور تیتر کی نسل کا ایک نایاب پرندہ دوبارہ دریافت کیا ہے جسے آخری بار 140 سال قبل دیکھا گیا تھا۔

ماہرین کا کہنا ہے کہ 140سال بعد ملنے والی یہ انتہائی غیرمعمولی کامیابی ہے۔

اوڈوبون نامی جریدے کے مطابق یہ پرندہ ماہِ ستمبر میں جزیرہ فرگوسن میں دیکھا گیا تھا جو پاپوا نیو گنی کے مشرقی ساحل کے قریب واقع ہے۔

سیاہ رنگ کے گردن کے بالائی حصے والے تیتر کی جسامت مرغی جتنی ہے اور وہ ان پرندوں میں شامل ہے جنہیں ایک صدی سے زیادہ عرصے سے نہیں دیکھا گیا۔

یہ نایاب پرندہ ایک ایسا پرندہ ہے جس کے بارے میں1882 میں پہلی بار ذکر کے بعد محققین نے کسی اور دستاویز میں اس کے بارے میں ذکر نہیں کیا۔

اس حوالے سے امریکی برڈ کنزروینسی میں گم گشتہ پرندوں کے پروگرام کے ڈائریکٹر اور آٹھ رکنی مہم کے شریک قائد جان سی مٹرمیئر نے کہا کہ کسی ایسی چیز کو پانا جو اتنے عرصے سے دکھائی نہ دی ہو اور آپ سوچ رہے ہوں کہ وہ معدوم ہوچکی ہے، پھر پتہ چلے کہ وہ معدوم نہیں ہوئی تو ایسا محسوس ہوتا ہے کہ جیسے خیالی پرندہ یونی کورن یا دیو قامت گوریلا مل گیا ہو۔