گورنر خیبر پختونخوا کے تقرر کے لئے صدر مملکت کو سمری ارسال کردی گئی ہے۔

تفصیلات کے مطابق وزیراعظم آفس نے گورنر کے پی کے کے تقرر کی سمری صدر کو ارسال کر دی ہے ۔

سمری میں حاجی غلام علی  کو گونر کے پی بنانے کی تجویز پیش کی گئی ہے جن کا تعلق جمیعت علماء اسلام فضل الرحمان گروپ سے ہے۔

خیال رہے کہ صدر مملکت کی منظوری کے بعد حاجی غلام علی گورنر خیبرپختونخوا تعینات ہوں گے۔

حاجی غلام علی کا تعلق جے یو آئی (ف) سے ہے، مولانا فضل الرحمان نے انہیں نامزد کیا ہے۔

غلام علی پشاور کے ضلعی ناظم بھی رہ چکے ہیںاور اب ان کے بیٹے زبیر علی پشاور کے میئر ہیں۔

ان کی تقرری کا سیاسی و سماجی حلقوں میں خیر مقدم کیا جائے گا تاہم تاجر برادری بھی ان کی تقرری کا خیر مقدم کرے گی۔

واضح رہے کہ 10 اپریل کو سابق وزیراعظم عمران خان کے خلاف تحریک عدم اعتماد کے بعد، پاکستان تحریک انصاف (پی ٹی آئی) کے بانی اراکین میں سے ایک، شاہ فرمان نے 11 اپریل 2022 کو باضابطہ طور پر اپنا استعفیٰ پیش کیا اور اسے صدر عارف علوی کو بھجوا دیا تھا۔

اس کے بعد سے خیبرپختونخوا اسمبلی کے اسپیکر مشتاق احمد غنی آئینی تقاضوں کے مطابق لیکن محدود اختیارات کے ساتھ قائم مقام گورنر کے طور پر خدمات انجام دے رہے ہیں۔

گزشتہ تقریباً آٹھ ماہ سے پاکستان ڈیموکریٹک موومنٹ کے اتحادی شراکت دار اسٹریٹجک اہمیت کے حامل صوبے کے گورنر کی تقرری پر اتفاق رائے تک پہنچنے میں ناکام رہے ہیں۔

علاوہ ازیں گزشتہ ایک ماہ سے میڈیا میں یہ خبریں گردش کر رہی ہیں کہ حاجی غلام علی گورنر بن سکتے ہیں تاہم ان کی تعیناتی کا نوٹیفکیشن جاری نہیں کیا گیا تھا۔