پاکستان کبڈی فیڈریشن نے سرکل کبڈی ورلڈکپ کے لیے 20  رکنی قومی ٹیم کا اعلان کردیا۔

تفصیلات کے مطابق پاکستان کبڈی فیڈریشن نے سرکل کبڈی ورلڈکپ کے لیے 20 رکنی ٹیم کا اعلان کردیا ہے۔محمد عرفان ٹیم کی قیادت کریں گے جبکہ شفیق احمد  کو ٹیم  کا نائب کپتان مقرر کیا گیا ہے۔

دیگر کھلاڑیوں میں بن امین،  توصیف لیاقت، قمر زمان، ظفر  اقبال، ارسلان محمود، محمد  نفیس، مشرف جاوید،کلیم اللہ، اکمل شہزاد، محمد سجاد، بلال  محسن،وقاص احمد، ساجد  نثار،  عبیداللہ، شاہرام ساجد، راشد  محمود، محمد ذوالقرنین اور  ہیرا بٹ شامل ہیں۔

آفیشلز میں عامر  محمود  منیجر، طاہر وحید  ہیڈکوچ،  فریاد علی کوچ اور شہزاد  حنیف اسسٹنٹ کوچ مقرر کیے گئے۔

یاد  رہے کہ سرکل کبڈی ورلڈکپ کا میلہ سجنے میں دو روز باقی ہیں۔کبڈی ورلڈکپ کا آغاز 9 فروری سے  ہوگا۔

پاکستان کے صوبائی دارالحکومت لاہور میں سرکل کبڈی ورلڈکپ کی تیاریاں زور و شور سے جاری ہیں ۔ورلڈ کپ کے میچز لاہور، فیصل آباد اور گجرات میں شیڈول ہیں۔

سیکرٹری پاکستان کبڈی فیڈریشن رانا سرور کے مطابق بھارت سمیت 10 ممالک نے اس ایونٹ میں شرکت کی تصدیق کررکھی ہے۔ غیرملکی ٹیموں کی آمد گذشتہ روز سے شروع ہوچکی ہے۔

مجوزہ پروگرام کے مطابق افتتاحی تقریب 9 فروری کو پنجاب اسٹیڈیم لاہور میں ہو گی۔

پہلے تین دن میچز لاہور میں رکھے گئے ہیں،دو دن فیصل آباد ان میچز کی میزبانی کرے گاجبکہ ایک دن گجرات میں دومیچ شیڈول ہیں۔

لاہور میں ہونے والے میچز سہ پہر چار سے آٹھ بجے تک کھیلے جائیں گے۔ فیصل آباد میں بھی یہ ہی اوقات مقرر کیے گئے ہیں، صرف گجرات کے میچز دن میں ہوں گے۔

سیمی فائنل اور فائنل  میچز لاہور میں ہوں گے۔

ورلڈ کپ کی فاتح ٹیم کو ایک کروڑ روپے انعام رقم دی جائے گی جبکہ رنر اپ کو 75 لاکھ روپے ملیں گے۔

 ایونٹ کا مقصد کھیل کے فروغ کے ساتھ ملک میں غیر ملکی ٹیموں کے لیے دروازے کھولنے میں مدد دینا ہے۔