ماحولیاتی تبدیلی ہماری زمین کو بالکل برباد کردے گی۔

تفصیلات کے مطابق سماجی تنظیم ’ایکسٹنکشل ربیلن‘ اور ایمازون واچ کی جانب سے لوگوں میں شعور بیدار کرنے کے لیے ایک انتہائی مختصر دورانیے کی فلم جاری کردی گئی۔

فلم میں تنظیموں کے تعاون سے ماحولیاتی آلودگی کے خلاف اہم کردار ادا کرنے والے ہولی وڈ ہدایت کار شان مینسن نے ’دی گارجین آف لائف‘ نامی انتہائی مختصر فلم جاری کی جس میں صرف ایک ہی کمرے میں کرداروں کو زندگی بچاتے ہوئے دکھایا گیا ہے۔

یاد رہے کہ دنیا کے سب سے بڑے جنگلات ایمیزون سے لے کر آسٹریلوی جنگلات میں لگنے والی آگ اور ملائیشیا کی چٹانوں سے پھوٹنے والے آگ کے شعلوں سے لے کر برساتوں اور سیلابوں تک کی آفتیں ماحولیاتی تبدیلی کا ہی نتیجہ ہیں۔

ماحولیاتی صورتحال پر جاری کردہ فلم میں جوکر فلم کے ہیرو نےبھی کردار ادا کیا ہے۔

گزشتہ برس ریلیز ہونے والی تھرلر کامیڈی فلم ’جوکر‘ کے ہیرو جیکوئن فیونکس کو دیکھا جا سکتا ہے کے وہ اس 2 منٹ کی فلم میں بھی مرتی زندگی کو بچا رہے ہیں۔

اس فلم میں امریکا ہسپتال کا آپریشن تھیٹر دکھایا گیا ہے جہاں مرد و خواتین ڈاکٹر انتہائی تشویش ناک حالت میں لائے گئے مریض کی زندگی بچاتے دکھائی دیتے ہیں۔

فلم میں دیکھا جا سکتا ہے کہ تمام ڈاکٹرز اس مریض کو بچانے کی ہر ممکن کوشش کر رہے ہیں۔

فلم کے اختتام میں دکھایا گیا ہے کہ ڈاکٹر مریض کو بچانے کی کوشش کرتے ہیں لیکن مریض دم توڑ دیتا ہے۔

ڈاکٹر مایوس ہوکر آپریشن تھیٹر سے نکلنے لگتے ہیں تو عین اسی وقت مر جانے والے مریض کے ہاتھوں کو ہلتا ہوا دکھایا گیا ہے اور ساتھ ہی اس کے چہرے میں نہ بھجنے والی آگ کو دکھایا گیا ہے۔

فلم کے اختتام میں مریض کے جسم سے شروع ہونے والی آگ کو دنیا کے نقشے میں دکھاتے ہوئے یہ پیغام دینے کی کوشش کی گئی ہے کہ ماحولیاتی تبدیلی کی وجہ سے جنگلات میں لگنے والی آگ کسی کو نہیں بخشے گی۔

یاد رہے کہ محض 2 منٹ کی مذکورہ فلم کو 6 فروری کو جاری کیا گیا تھا ۔

اس فلم کی ویڈیو تیزی سے سوشل میڈیا پروائرل ہو رہی ہے ، فلم کو یوٹیوب سمیت دیگر ویڈیو اسٹریمنگ ویب سائٹس اور پلیٹ فارمز پر بھی ریلیز کیا گیا تھا اور اب تک فلم کو کروڑوں بار دیکھا جا چکا ہے۔

واضح رہے کہ ماحولیاتی تحفظ کے لیے کام کرنے والے افراد اور ارکان نے فلم کی تعریف بھی کی ہے۔