لاہور میں موجود سابق وزیر خزانہ اسحاق ڈار کی رہائش گاہ کو پناہ گاہ میں تبدیل کردیا گیا ہے۔

تفصیلات کے مطابق حکومت کی جانب سے سابق وزیر خزانہ کے گھر کو پناہ گاہ میں تبدیل کرنے کا فیصلہ شام کے وقت کیا،4 کنال 11 مرلے پر مشتمل اسحاق ڈار کے گھر کا پہلے نیلامی کاحکم دیا گیا تھا۔

محکمہ سوشل ویلفیئر نے پناہ گاہ کا بورڈ بھی گھر کے بار آویزاں کردیا ہے۔

اسحاق ڈار کے گھر کا رقبہ 4 کنال 11 مرلے پر مشتمل ہے جبکہ گھر میں بے گھر افراد کے لیے بستر بھی لگادیئے گئے اور رہائش گاہ میں 40 افراد کے قیام کے انتظامات کیئے گئے ہیں۔

اسحاق ڈار کی کوٹھی نیلام کرنےکااشتہار، قیمت کیامقررکی گئی؟

حکومتی شخصیات کا ردعمل

وفاقی وزیر برائے مواصلات نے سوشل میڈیا پر اپنے ایک پیغام میں کہا ہے کہ ملک کی خزانے کو لوٹنے والے مفرور وزیر خزانہ کی رہائش گاہ کو پناہ گاہ بنا دیا گیا ہے۔

انہوں نے کہا کہ جس نے پاکستانی قوم کو 10 سالوں میں 24 ہزار ارب کا مقروض بنایا اب اب عوام کی دولت عوام کے استعمال میں لائی گئی ہے۔

وفاقی وزیر برائے بحری امور علی زیدی نے بھی سوشل میڈیا پر اپنے پیغام میں کہا ہے کہ سال کی اب تک کی سب سے اچھی خبر ملی ہے کہ مفرور اسحاق ڈار کی رہائشگاہ پناہ گاہ میں تبدیل کردیاگیا ہے۔

دوسری جانب مسلم لیگ ن کے رہنما عطا تارڑ نے اسحاق ڈار کے گھر کو بےگھر افراد کی پناہ گاہ بنانے کیخلاف عدالت میں جانے کا اعلان کردیا ہے۔

انہوں نے کہا ہے کہ عدالت نے حکم امتناع دیا ہو اہے اس پر استعمال نہیں کیا جاسکتا ہے۔

واضح رہے کہ اس سے قبل یہ فیصلہ ہوا تھا کہ مسلم لیگ ن کے رہنما اور سابق وزیر خزانہ اسحاق ڈار کا لاہور کے علاقے گلبرگ میں واقع 4 کنال 17 مرلے کا ہجویری ہاؤس نیلام ہوگا۔

سابق وزیر خزانہ کے گھر کی نیلامی 28 جنوری کو ہوگی جس کیلئے لاہور کی ضلعی انتظامیہ نے اشتہار بھی دے دیا تھا۔

بارہ کمروں پر مشتمل 4 کنال 17 مرلے کی کوٹھی کی سرکاری بولی 18 کروڑ 50 لاکھ روپے مقرر ہے،

جس کیلئے 25فیصدرقم فوری جبکہ بقیہ 7روزمیں جمع کرانا ہوگی، اسحاق ڈار کا 4کنال 17مرلے کا بنگلہ ایچ بلاک گلبرگ لاہور میں واقع ہے۔