وزیر اعظم آزاد حکومت ریاست جموں و کشمیر سردار تنویر الیاس خان نے کہا ہے کہ میں نے عوام کے حق پر نہ سودا کیا اور نہ کرنے دیا۔

تفصیلات کے مطابق وزیر اعظم آزاد حکومت ریاست جموں وکشمیر سردار تنویر الیاس خان نے اپنے ایک بیان میں کہا کہ مظفرآباد ڈویژن میں بلدیاتی انتخابات کے پہلے مرحلے کا کامیاب انعقاد جمہوریت کی فتح سیاسی نظام کی کامیابی ہے جس پر تمام سیاسی کارکنوں کو مبارکباد پیش کرتا ہوں۔

      سردار تنویر الیاس خان نے تحریک انصاف کی شاندار کامیابی پر مبارکباد دیتے ہوئے اس عزم کا اظہار کیا کہ لوگوں نے جس اعتماد کا اظہار کیا ہے اس پر پورا اترنے کے لئے اپنی تمام صلاحیتیں بروئے کار لائیں گے۔

انہوں نے کہا کہ تحریک انصاف کے شیر دل کارکنوں نے بلدیاتی انتخابات میں کامیابی حاصل کی اور پارٹی کے علم کو بلند کرکے یہ ثابت کردیا کہ پی ٹی آئی مظفر آباد میں اپنی کارکردگی کی بناء پر مزید مضبوط ہوئی ہے اور ہم اسی طرح  پونچھ اور میر پور ڈویژن میں بھی کامیابی حاصل کر یں گے۔

ان کا کہنا تھا کہ میں تمام سیاسی جماعتوں کے عہدیداران اور کارکنوں کو سراہتا ہوں، سیاست اور جمہوریت کو آگے بڑھانے میں اہم کردار ادا کیا اور کر رہے ہیں، سب سے بڑی جو مثال ہے کہ کم سکیورٹی کے باوجود بھی انہوں نے ذمہ داری کا مظاہرہ کیا اور پورے  الیکشن کا ماحول پرامن رہا۔

وزیر اعظم آزاد حکومت ریاست جموں و کشمیر نے کہا کہ آزاد کشمیر کے لوگوں کا سیاسی شعور اور بالیدی کا بلند پایہ مقام دیکھنے کو ملتا ہے اور اسکے ساتھ آزاد کشمیر کی انتظامیہ اور پولیس کا جو معیار اور کارکردگی سامنے آئی ہے وہ اپنی مثال آپ ہے جبکہ ہمارے ادارے اپنی کارکردگی کی بناء پر مزید بہتر ہو رہے ہیں اور یہ خوش آئند اقدام ہے-

انہوں نے کہا کہ بلدیاتی انتخابات میں مسلم لیگ ن کے صدر شاہ غلام قادر ،سابق وزیراعظم راجہ محمد فاروق حیدر ،اپوزیشن لیڈر چوہدری لطیف اکبر ،پیپلزپارٹی کے رکن قانون ساز اسمبلی میاں عبد الوحید ،سید بازل علی نقوی اور سردار جاوید ایوب  کو اپنے اپنے  حلقوں میں شکست کا سامنا کرنا پڑا-

ان کا کہنا تھا کہ عوام کا تحریک انصاف کی قیادت پر اعتماد کا مظہر تھا اور انشاءاللہ میں بھی اپنے لوگوں کے اعتماد پر پورا اتروں گا۔

سردار تنویر الیاس خان نے کہا کہ 31 سال تک آزاد کشمیر کی عوام کو بنیادی حقوق سے محروم رکھا گیا، بلدیاتی الیکشن پر مجھے بلیک میل کرنے کی بھی کوشش کی گئی، کہا گیا کہ حکومت کرنی ہے یا بلدیاتی الیکشن کروانے ہیں لیکن میں نے عوام کے حق پر نہ سودا کیا اور نہ ہی کرنے دیا۔

انہوں نے کہا کہ بلدیاتی الیکشن منعقد کروانا میرا عزم تھا جبکہ آزاد کشمیر کی سول انتظامیہ اور پولیس نے سر فخر سے بلند کر دیا ہے۔

ان کا کہنا تھا کہ بلدیاتی الیکشن کے پہلے مرحلے میں تحریک انصاف نے واضح کامیابی حاصل کی ہے جبکہ مظفرآباد ڈویژن میں ن لیگ اور پیپلزپارٹی نے اسمبلی کی چھ سے زائد سیٹیں لی ہوئی تھیں مگر تحریک انصاف پھر بھی سرخرو ہوئی ہے۔

سردار تنویر الیاس خان نے کہا کہ بلدیاتی انتخابات میں فتح و شکست کوئی معنی نہیں رکھتی بلکہ اصل کریڈٹ یہ ہے کہ تحریک انصاف کی حکومت نے عمران خان کے ویژن کے مطابق عوام سے کیا گیا اپنا وعدہ پورا کر دکھایا اور اسکے لئے حکومت نے تمام تر وسائل بھی فراہم کیے۔

انہوں نے کہا کہ ہمیں یہ اعزا حاصل ہے کہ پی ٹی آئی نے آزاد کشمیر بھر میں نوجوانوں کو قیادت دی ہے، یہ نوجوان ہمارا اثاثہ ہیں ہم نے انہیں عوامی معاملات میں حصہ دار بنا کر سیاسی اجارہ داریاں اور نمبرداریاں ختم کی ہیں۔

ان کا کہنا تھا کہ ہم نے 31 سال بعد بلدیاتی انتخابات کروائے ہیں جو کہ ایک سیاسی تاریخ ہے فیصلہ ہم مورخ پر چھوڑتے ہیں کہ وہ اسے کس طرح دیکھے گا۔

وزیراعظم  سردار تنویر الیاس خان نے مظفرآباد ڈویژن میں ہونے والے بلدیاتی الیکشن کے کامیاب انعقاد پر انتظامیہ کو مبارکباد دیتے ہوئے شاندار الفاظ میں خراج تحسین پیش کیا اور دیگر محکمہ جات کے ساتھ محکمہ اطلاعات کی کاوشوں کو بھی سراہا ہ جنہوں نے شاندار کمپین کے ذریعے لوگوں کو ووٹ کی اہمیت سے اجاگر کرنے اور پرامن طور پر حق رائے دہی استعمال کرنے کی جانب راغب کرنے میں اہم کردار ادا کیا ہے۔

انہوں نے کہا کہ مجھے اپنی پولیس اور دیگر اداروں پہ فخر ہے جنہوں نے پرامن، صاف شفاف اور غیر جانبدار الیکشن کروانے میں کردار ادا کیا، آج عوام سے کیا وعدہ مکمل کر کے خود پر فخر محسوس کر رہا ہوں جبکہ عوام کا جوش و خروش بھی قابل تعریف تھا۔

 ان کا کہنا تھا کہ الیکشن میں کامیاب ہونے والے تمام امیدواروں کو دلی مبارکباد پیش کرتا ہوں، امید ہے وہ اپنے علاقے کے مسائل حل کرنے میں حکومت کا ساتھ دیں گے۔

 وزیراعظم ٓزاد حکومت ریاست جموں وکشمیر سردار تنویر الیاس خان نے الیکشن کمیشن کی کاوشوں کو سراہا اور ان کی کوششوں کی تعریف کی جبکہ وزیراعظم آزاد حکومت ریاست جموں وکشمیر سردار تنویر الیاس خان نے بلدیاتی الیکشن میں پاک فوج کے کردار کو بھی سراہا۔