مسلم لیگ ن کے قائد نواز شریف نے حمزہ شہباز کو پنجاب اسمبلی بچانے کا ٹاسک دے دیا۔

ذرائع کے مطابق نواز شریف نے حمزہ شہباز سے ٹیلی فونک رابطہ کیا اور ان کو اہم ہدایات دے دیں۔

ذرائع نے بتایا کہ ن لیگ نے پرویز الہیٰ کے خلاف تحریک عدم اعتماد لانے کا فیصلہ کر لیا ہے، پیپلزپارٹی کے مشاورت کے بعد جلد ہی تحریک عدم اعتماد پنجاب اسمبلی میں پیش کی جائے گی۔

ذرائع کا کہنا ہے کہ مسلم لیگ ن نے تمام ایم پی ایز کو ارکان پنجاب اسمبلی سے تحریک عدم اعتماد پر دستخط کروا لئے۔

ذرائع کے مطابق ضرورت پڑنے پر وزیر اعلیٰ پنجاب پرویز الہیٰ کے خلاف تحریک عدم اعتماد جمع کروا دی۔

خیال رہے کہ تحریک عدم اعتماد لانے کا مقصد وزیراعلیٰ کو پنجاب اسمبلی تحلیل کرنے سے روکنا ہے۔

دوسری جانب اسمبلیاں تحلیل ہونے کے معاملے پر ن لیگ کی پیپلزپارٹی سے مشاورت شروع ہوگئی ہے، جس کی صدارت حمزہ شہباز کررہے ہیں۔

اجلاس میں پیپلزپارٹی کے حسن مرتضیٰ اور شازیہ عابد، ن لیگ کے عطااللہ تارڑ اور ذیشان رفیق سمیت دیگر شامل ہیں۔

مشاورتی اجلاس میں تحریک عدم اعتماد کس دن جمع کروائی جائے، اس پر مشاورت کی جائے گی۔

ذرائع نے بتایا کہ اجلاس میں حسن مرتضی اور حمزہ شہباز پنجاب اسمبلی کے مستقبل اور موجودہ سیاسی صورتحال پر تبادلہ خیال کریں گے اور وزیراعلیٰ پنجاب کو اعتماد کا ووٹ لینے، قانونی پہلوؤں پر غور ہوگا۔

خیال رہے کہ اجلاس کے بعد حسن مرتضیٰ، عظمی بخاری اور عطااللہ تارڑ پریس کانفرنس بھی کریں گے۔